Aizawl district court Special Judge (Prevention of Corruption Act) Chakma Autonomous District Council (CADC)-a CEM hlui nupui Sujata Chkama chu eiruk thubuaiah thiam loh a chantir.
Special Judge (PC Act) Dr HTC Lalrinchhana chuan nimin khan court thuremna hi a puang a, heta tarlan a nih danin, CADC sorkar chuan kum 2012 khan an session hall sakna turin cheng nuai 232 an dawng a, he hnathawk tir hian Contractor Pu RV Hluna, Edenthar Veng chu thlan a ni a, hetihlai hian khatihlaia Chief Executive Member Pu Buddha Lila Chakma chuan he hna hi contractor hnen atanga chhuh sakin, ‘Power of Attorney’ (Deed of Agreement) hmangin a nupui Pi Sujata Chakma chu a thawh chhunzawm tir a ni.
Court-a finfiah a nih danin, Pu Buddha Lila Chakma leh a nupui te hian session hall sak hna hi an chawlhsan vat chungin sum thahnem tak an la a, cheng nuai 34 sing 6 sang 6 leh 585 (34,66,585) chu an eiruk nia finfiah a ni a, eiruk thubuaiah hian Pi Sujata Chakma chu thiam loh chantir a ni a, a pasal Pu Buddha Lila Chakma erawh a thih avangin thubuai tih tawp a ni thung.
Eiruk thubuaia thiam loh chantir Pi Sujata Chakma hi bail-a chhuak lailawk lai a ni a, court in thiam loh a chantir tak avangin jail ah dah luh nghal a ni a, a hremna hi March ni 18,2024 ah puan a ni ang.