Mizoram cooperative siam tha pawl (MCSP) chuan Mizoram sorkarin society hman tangkai a tum chu lawmawm an ti a, society te pawh hman tlaka in buatsaih turin an ngen.
MCSP hruaitute chuan nimin khan Aizawl Press Club-ah chanchinbu mite an kawm a, sorkar laipuiin ram pum intodelhna atana society te hmanrua atan hman a tum anga Mizoram sorkar pawhin soociety hmang tangkai a tum chu lawmawm an tih thu an sawi a, sorkar leh society te thawk hoin Mizoram society kalphung tha chu Mizoram ah tun din zel an tum thu a sawi.
MSCP hruaitute chuan nikum 2023 kha Mizoram cooperative inthlanpui kum a ni a, MCSP in society siam tharna atan thuthlung an siam thu leh chumi zawm tura hming ziaka in tiam te’n board of director an chuh a, hneh taka thlan tlin an nih thu an sawi a, inthlan hnua kum tam tak chhung cooperation department leh society te thawhhona nei thei lo chu tha taka suihzawm a nih thute, Mizoram cooperative Act siam tha turin department nen hma an lak mek thute an sawi.
An hmalakna dang te sawi chhunzawmin, State level society-a Board of director te chu siam tha hna thawk tura lungrual taka ke an pen ho thute, Mizoram cooperative apex bank chu schedule bank a lo nih theihna tura hma an lak mek thute, Apex Bank branch thar pariat hawn tum mek a ni thu a sawi.
MIZOFED in kuhnathawktute thlai thar lei leh hralhsak dan tur a buaipui mek thute an sawi bakah AMC in khawpui chhungah vawk vulh a khap tak avangin thingtlangah Pig Society a tam thei ang ber din tumin PIGFED board of director ten nasa taka hma an lak thute an sawi bawk a ni.