Champhai District in an kum 25 tlin, silver jubilee chu nimin khan Champhai DC Office Complex, Keifang tlangah an lawm a, khuallian Chief minister Lalduhoma’n Champhai district chhunga khualzin hipna hmunhma te chu nasa takin an thuam tha dawn tih a sawi.
Chief minsiter Duha chuan Champhai district kum 25-na, Silver Jubilee puala buatsaih Lungphun, photo gallery hawngin, Souvenir a tlangzarh a, hemi hnuah inkhawm thu a sawi naah Champhai district chu pi leh pute sulhnu hmun pawimawh tam tak neitu, khualzin hipna hmunhma ngah tak a nih thute, chung khualzin hipna hmunhma te chu an thuam tha dawn a, mipuite pawhin khualzinte lakah an hawihawm thiam a tha hle tih a sawi.
Champhai district chu Buh leh thlai dang tharchhuak tam,Grape wine siamna hmun pahnih awmna, Sangha thar tamna a ni tih leh hmalak theihna ram pawh an la nei tha hle tih a sawi a, he district ah hian hmasawnna a kal zel dawn a, sawrkar pawhin hmachhawp a ngah hle tih a sawi.
Duhoma chuan, Champhai district-in raltlan an buaipui dan sawi bawkin, Myanmar-a Zohnahthlak ten harsatna an tawk a, an himna zawngin Mizoram an pan a, chung mite lo dawngsawng hmasatu tun thlenga engemawzatte enkawl mektu chu Champhai district an nih thu sawiin, kan unaute chhawmdawl kawnga khawtlang leh kohhran te hmalakna tha tak avangin lawmthu ka sawi, a ti bawk.
Silver Jubilee lawmna inkhawm hi bawrhsap James Lalrinchhana’n a kaihruai a, H. Lallianvela’n Champhai district nei tura hma an lo lak tawh dan te a sawi a, Champhai district a MLA ni mekte pawhin thusawina an nei bawk a. Heng bakah hian thusawi leh item pawimawh dang engemawzat a awm a, tlai lamah Jubilee ruai hlim takin an theh a ni.
Champhai District hi December ni 12, 1997 ah puan a ni a, sawrkar hriattirna hi a kumleh March ni 11, 1998 ah chhuakin, hemi kum vek April thlaah ropui taka hawn a ni.