- Lallunghnema, Charity Lodge
‘Hotu pakhat chauh a awm, chu chu customer a ni. Company-a thawktute a tiphur theiin a tichhe vek thei a. Chairman pawh a zuah lova…customer chuan company dang a dawr thei tho tih a inhriat avangin’.
‘Customer is King’ tih thu chher chhuaktu hi John Wanamaker a ni a.He a thu chher ropui tak avang hian John hi a lar phah em em a ni.Ani hi kum 20 chhung zet mai Field’s Store-ah a thawk a. He kum 20 chhung hian store neitu Marshall Field-a idealogy chuan a rilru a hneh hle a.He idealogy ril tak atang hian he thu ropui tak ‘Customer is King’ tih hi John-a hian a lo phuah chhuak ta a ni.
Tunlai chhanah thil hralhtute thil tum ber tur chu customer-te mamawh ngaihtuah sak a, tihpui tlinsak hi a ni. Hetiang hi a nih avangin sellerte lakah customer-te chu an lal hliah hliah a. Mahse, mi tam takin he ngaihtuahna tha tak hi an hre thiam pha tlat si lo a ni.
Ram bung khata Lal chuan ro a rel a, Lal a ni.Thu neihna tam tak a nei.Hetih lai a thu neihna pakhat mah nei lo. ‘ Lal a ni’, tia phur taka kan han pau pui ve hram erawh chu customer a ni a.Mahse, Lal a nih hi amah Consumer ngei pawhin a inhre chiang hek lo. Heng Lal pahnih, ram chunga roreltu leh thil leitu te Lal nih dan hi a inpersan hle. Ram chunga roreltu, thu neitu te chu tlem te an ni a. Hetih laiin thu neihna pakhat mah nei lo, customer-te chu tam tak an ni thung. Mitin hi customer/consumer kan ni vek. Gas Agent leh Retailer chenin, Consumer nih an bang bik lo a ni.
Dawrkai sumdawngte, politician-te leh sawrkar hnathawktute lamin customer/consumer an ni vek a nih chu! Mi zawng zawng Consumer Protection Act hian min huap vek a ni e. I pawm leh pawm loh a ni lova, consumer i ni hrim hrim! Duh a, duh loh lam a ni hek lo. Thil ka lei chuan, mi service ka hman pawhin consumer ka ni.
He thu hi han chhiar teh! Fuih phurtu, tichaktu, tihuaisentu che a nih ka beisei.
Mi rinawm leh mi huaisente dinchanna Zoram khawvelah hian mi rinawm lo leh dawihzepte chuan hmun tha an chang dawn lo a ni. Consumer Issue hi a lian tulh tulh dawn a; consumer-te hamthatna pawh a tam zel thung dawn a ni.
Hnahthial khawpui chuan thil tha leh lawmawm a hmel hriat leh ta! Kan nau Lalawmpuia thu thawn hi han chhiar teh le!
‘Hnahthial District Commission-in bank pakhat thiam loh a chantir:
President F. Rohlupuia leh member pahnih Liansangi Hmar leh K. Lalhunmawiate awmna Hnahthial District Consumer Disputes Redressal Commission (consumer court) chuan an thubuai dawn (complaint received) pakhat thu rel felin Manager, Mizoram Co-operative Apex Bank Hnahthial Branch chu thubuai theh luttu hnenah Rs. 50000/- leh a buaipuina man Rs. 5000/- chu ni 60 chhunga pe turin thu a pe.
‘Consumer pakhat chuan kum 2022 June ni 17 khan Mizoram Co-operative Apex Bank Hnahthiala ami account atangin Mizoram Rural Bank a consumer account-ah Rs. 50000/- a transfer tir a: mahse, he pawisa a transfer-na tur MRB account-ah a lut lova, Apex Bank account-ah a let leh bawk hek lo.
‘He pawisa hi bo buaipui hian on-line Legal India-ah Rs. 2359/- chawiin complaint an theh lut a, advocate Vishal Chaurasia an ruai. Hei bakah hian Apex Bank Head Office-ah leh Branch ah vawi tam tak an kal a, phone call-in Main Branch, I. T Department lam an be bawk a. Kum khat leh ni 10 chhung he pawisa bo hi an buaipui a; mahse, an beidawng ta a.
‘Tichuan, Hnahthial District Commission-ah Mizoram Co-operative Apex Bank, Hnahthial Branch leh Mizoram Rural Bank, Hnahthial Branch lakah Dt. 3.8.2023 ah thubuai an thehluta, Hnahthial District Consumer Case no.2. of 2023 anga pawm a ni.’
‘Thubuai ngaihtuahnaah Mizoram Co-operative Apex Bank, Hnahthial Branch leh Mizoram Rural Bank, Hnahthial Branch aiawhin an Ukil an inlan a. Dt. 22.2.2024 -ah District Commission chuan thutlukna a siam a. Ni 60 chhungin he pawisa chungchanga mawhphurtu Manager, Mizoram Co-operative Apex Bank, Hnahthial Branch chuan pawisa transfer neitu Consumer hnenah hian Rs. 50000/- leh a pawisa bo a buaipui nana a senso Rs. 5000/- pe turin thu a pe a ni.’
Comment:
Hnahthial District Consumer Commission hian Judgement an siam tha thawkhat hle. Complainant pawh hi a fakawm, tha leh zualah chuan mental agony charge hi tel ve se, a duhawm hle a ni.
A khaikhawmna atan chuan consumer-te hnehna a ni a. Consumer-te hi an pawimawh hle a, service provider-te pawh hian an dah pawimawh tur a ni; palzam mai mai hi a rem lo a ni.
March ni 15 World Consumer Day kan lo thleng leh mai dawn a. Khun khan leh tangkai taking i hmang ang u. Kei erawh chuan Lunglei lamah he ni hi ka hmang dawn a ni. Kumin World Consumer Day thupui hi Fair and Responsible Use of AI for Consumer tih a ni a. AI hi artificial intelligence tihna a ni a, lo inhrilhfiah ve tawh mai teh u.
Chawlhkar lehah he chanchinbu hmang hian kan titiho leh dawn nia.