Inrinni zana English Premier League khelhah Fulham chuan an mikhual Tottenham Hotspurs chu si thum faiin an lo hneh. Fulham lakah an tlawm vangin Spurs hian palina-a inhlankai an tumna an puitlin zo lo. Inkhel dangah Burnley chuan Brentford an hneh a, him beiseina an nei thar.
Tottenham hi panganaa awm mek an ni a, khelh khata khel tlem zawk chungin palinaa awm mek Aston Villa nen an inkarah point hnih chiah a tla zep. Fulham an hneh a nih chuan Aston Villa an lehpel ang a, top 4 huangah an kir leh chiah ang. Top 4 huanga kir tum viau mah se si thum fai ngawtin mualneitu Fulham an ngam ta lo thung.
Fulham hi Tottenham lakah an khel tha a, minute 42-naa Rodrigo Muniz goal thun hmangin hma an hruai. Chawlhlaw hmain goal dang thun belh thei lo mah se, chawlhlawk hnu lamah goal an thun belh leh thuai. Second half tan atanga minute lina lekah Saša Lukić chuan goal thunin an hmahruaina a tizau a. Goal hmahruai thuntu Rodrigo Muniz chuan an goal thumna a thun zui leh bawk. Chak mamawh viau mah se Tottenham hian hun tawp thlengin goal an thun thei lova, Fulham lakah si thum fai ngawta tlawmin, Aston Villa an lehpel thei ta lo a ni.
Inrinni zana inkhel dangah 19-naa awm mek Burnley chuan an mikhual Brenford chu Jacob Bruun Larsen leh David Datro Fofana te goal thun hmangin an hneh. Turf Moor-ah Brentford in bul an tan chhe viau a, minute 8-na lekah Sergio Reguilón hnawhchhuah a ni a, penalty an chawi zui bawk. Kim lo zawk ni chunga si hnih an phurh hnuin Kristoffer Ajer chuan goal thun bawk mah se an si phurh an sut zo thei lo va, uiawm takin an tlawm.
An mualah Burnley in hnehna an chan lai hian Luton Town leh an mikhual Nottingham Forrest te chu 1-1 in an lo inhnehtawk ve thung.