March 15, Zirtawpni tlai lam khan UEFA Champions league quar-final-a intum tur pawh fel a ni a, Arsenal hmabak a hautak dawn hle. Gunners hian quarter-final-ah Bayern Munich an hmachhawn dawn a, an chak mial a nih pawhin semi-final-ah Manchester City emaw Real Madrid emaw zawk zawk an hmachhawn zui leh a ngai dawn.
- Arsenal vs Bayern Munich
Arsenal leh Bayern Munich te hi an intum thei hle a, vawi 12 an inhmachhawn tawh. Vawi 12 an inhmachhawn tawhah Arsenal hian vawi thum chauh hnehna an chang a, vawi hnih dang inhnehtawk in, Bayern Munich hian vawi sarih lai hnehna an chang tawh thung. An intum hnuhnung ber chu 2016-17 champions league last 16-ah a ni a. German club lian hian last 16 thawhkhatna leh thawh hnihnaah 5-1 in hnehna an chang ve ve a. Si belhkhawmah 10-2 ngawtin hnehna an chang. Bayern Munich laka Arsenal chak hnuhnun ber chu October 2015-ah a ni a. Champions League group Stage-ah si hnih faiin hnehna an chang. Allianz Arena-a group stage khelh a nihin Bayern hian 5-1 in hnehna an chang tho thung.
An hnuhma enin Arsenal tan Bayern Munich hi khingpui huphurhawm tak, Indona muala German ral lian tluk zeta hlauhawm an ni. Bayern an ngam loh thinna zawng zawng kha hun kal tawh, thawnthu hlui ang a ni thei thung. Bayern Munich hi season kal mekah an ropui bik viau lo. German Bundesliga lamah Bayer Leverkusen an el phak lova, khelh khala khel tam zawk chungin Leverkusen hi point sarihin an phak lo mek. Tualchhung inelna dangah beisei an phak lo bawk. Champions League-ah hian an champion mial a nih loh chuan kut benga season khar thei dinhmunah an ding mek. Hetihlai hian Arsenal erawh chu Mikel Arteta hnuaiah an puitling ta viau a, EPL hmahruaitu an ni mek. Liverpool leh Manchester United chunga chuang mek an nih vangin Bayern Munich lakah inrintawkna sang tak nen an inlan ngei ang.
Bayern Munich an hneh mial a nih pawhin Arsenal tan kawng a harsa chhunzawm dawn. Semi-final-ah champion lai Manchester City leh UCL a club hlawhtling ber Real Madrid te inkhela chak zawk zawk an hmachhawn zui a ngai dawn. City leh Real hi tunhnaiah an intum thei viau a, tun hi a zawna vawi thum an intumna tur a ni. 2021-22 season khan UCL semi-final-ah an intum a, mak tak maiin Real Madrid hian City an lehthal a, final lutin an champion zui nghe nghe. 2022-23 season khan semi-final-ah an inhmachhawn zui leh a, City hian si belhkhawmah 5-1 a hnehna changin final a lut a. City pawh hi an champion zui ve leh bawk. Season kal mek quarter-final-ah an intum zui leh dawn a, inkhel hmuhnawm an lantir zui leh ngei tura ngaih a ni.
Real Madrid leh Manchester City te hi vawi 10 an intum tawh a, an inhnehtawk hle. La Liga club lian Real Madrid chungnung hretin, vawi li an chak a. City vawi thum chakin, vawi thum dang an inhnehtawk. Champion lai City leh vawi 14 champion tawh Real Madrid te inkhela chak zawk zawk hi champion turin rin an kai zui hle ngei ang.
- PSG vs Barcelona
Quater-final dangah French Ligue 1 champion Paris St-Germain leh La Liga champion FC Barcelona an inhmachhawn dawn a. Atletico Madrid leh Borussia Dortmund an inhmachhawn dawn bawk. La Liga club pathum ngawtin quarter-final an khel dawn a, La Liga club hlangin final khel thei dinhmunah an ding.
PSG leh Barcelona te hi an inhnehtawk hle a, vawi 12 an inhmachhawn tawhah chungnung zawk an awm lo. Vawi 12 an inhmachhawn tawhah hian vawi li ve ve hnehna an chang a, vawi li dang an inhnehtawk. An intum hnuhnung ber 2020-21 last 16-ah PSG hian si belhkhawmah 5-2 ngawtin hnehna an chang a, quarter-final an lut. Anni pahnih inkhela chak zawk zawk hian Atletico Madrid leh Borussia Dortmund te inkhela chak zawk zawk an hmachhawn zui dawn a, final luh theihna hun tha an nei.
Champions League quarter-final thawh khatna hi April ni 9 leh ni 10 zanah khelh a ni dawn a. April ni 9 zan hian EPL club pahnih Arsenal leh City an inlan dawn. Arsenal hian Emirates Stadium-ah Bayern Munich an mikhual ang a. Champion lai Manchetser City chu Real Madrid hmachhawn turin Santiago Bernabeu-ah an lenglut ve thung ang. Semi-final thawh hnihna hi April ni 16 leh ni 17-ah khelh a ni ve thung ang. April 30 leh May 1 ah semi-final khelh a ni ang a. Final hi June 1 khian Wembley Stadium-ah khelh a ni ang.