March 16, Inrinni zan khanFA Cup – Quarter-final khelh tan a ni a, champion lai Manchester City chuan si hnih faia Newcastle United hnehin semi-final an lut. Inkhel dangah Coventry City chuan Wolves an hneh nawlh a, semi-final an inhlangkai ve bawk.
Champion lai Manchester City hian Etihad Stadium-ah EPL club Newcastle United an mikhual. An mualah an khel tha viau a, chawlhlawk hmaa goal hnih an thun an chakpui. City goal hnihte hi Bernardo Silva thun ve ve a ni.
City hian an trophy kawl mek humhim tumin thapui an thawh a, an mikhual Newcastle United lakah chak an tumruh hle. Tha tho taka inlan an ni bawk a, goal pawh an thun har lo. Inkhel tan atanga minute 13-na lekah midfielder Bernardo Silva chuan Rodri siamsak atangin hmahruaina goal a thun. He goal hian Pep Guardiola team te a fuih phur viau a, inrintawkna sang zawk nen an mualah an inlan zui theih phah bawk.
Ball chang tam leh goal thn theihna hun tha ngah zawk City tan hian goal hmahruai thuntu Silva chuan minute 31-naah Rúben Dias siamsak atangin an goal hnihna a thun a, an hmahruaina a tizau. Silva goal hnih thun hnu hian an mualah an khel tha zui viau a, goal thun theihna hun tha pawh nei thin bawk mah se, goal dang an thun belh thei tawh lo tluan. Newcastle United pawhin hun tawp thlengin goal an thun thei lova, champion lai lakah si hnih faia tlawm in, FA Cup atangin an puanthuah an tel zui ta a ni.
City hian kum hmasa lama an trophy lak; Champions League, Premier League leh FA Cup te lak nawn leh tumin hma lam an pan a. Heng inelna lian pathumahte hian champion thei dinhmunah an la ding vek. Treble champion an ni nawn leh thei a nih ngat chuan record ropui tak an hnutchhiah ngei ang.
Inrinni zana inkhel dangah FA Cup quarter-final lut zinga team tenau ber, championship club Coventry City chuan mikhual an nihna hmunah Wolves chu 3-2 in an hneh nawlh a, mak tak maiin semi-final an lut nawlh.
Molineux Stadium a lenglut Conventry hi mualneitu Wolves lakah an tlawm teuh hle a, hun pek belha goal hnih an thun hmangin hnehna hlu bik an chang.
Rinkai lo zawk ni chunga bul tan tha a, Coventry City tan hian Ellis Simms chuan minute 53-naah hmahruaina goal a thun. He goal hian mualneitu a chhaihkawlh a, goal hnihin an mikhualte an chhang let. Rayan Aït-Nouri chuan minute 83-naah goal thunin an si phurh a sut a. Hugo Bueno chuan hun tawp dawn hnaih minute 88-naah hma an hruai letna goal a thun.
Wolves hi quarter-final lut tur ngei tura ngaih an nih laiin an chesual. Minute 90’+7-ah Ellis Simms chuan goal thunin an si phurh a sut. An si phurh an sut atanga minute thum hnu lekah Haji Wright chuan Coventry City hmahruai letena goal a thun leh ta mai a, thil mak a thleng. Hun tawp thlengin goal dang a luh belh tawh lova, Coventry City chuan inlehthalna lian thlentir in quarter-final an lut ta a ni.