#Zozam Times March 18: Agartala Mizo Welfare-in Aizawl – Agartala thlawhna service awm leh thei se an duh thu leh Mizoram sorkar lam atangin hmalak dan awm thei se an duh thu an sawi.
I&PR Deptt. ruahmannaa Tripura sorkar hmalakna thenkhat tlawha zirchiang tura Mizoram atanga kal thuthar thehdarhtute nen Tripura State Guest House, Agartala-a an inkawmnaah he thu hi Agartala Mizo Welfare hruaitu ten an sawi a. Aizawl – Agartala thlawhna service thin chu nikum khan tihtawp a nih thu sawiin, zirlai, missionary leh zin veivak thin dang te pawhin harsatna an tawh thu an sawi.
Aizawl – Agartala thlawhna service tihtawp a nih tak avangin Rs. 1,500 chauhva Agartala thleng thin khan Rs. 5,000 vel an sen a tul tak thu an sawi a. Aizawl – Agartala thlawhna service a awm leh theihna turin Mizoram sorkarin hma laksak thei se an duh thu Agartala Mizo Welfare hruaitute chuan an sawi a ni.
Kum 2009, August ni 15-ah welfare an indin tan thu sawiin, member 350 atanga 400 vel an awm mek niin Agartala Mizo Welfare hruaitute chuan an sawi a. An member zinga chhungkaw 10 vel chu Agartala-a awmnghet an nih thu an sawi.
Chapchar kut pawh kumtin an hman ve thin thu leh kuminah pawh April ni 11-ah hman an tum thu Agartala Mizo Welfare hruaitute chuan an sawi a. Mizo hnam lamin hlut a hlawh viau nia sawiin, sorkar hun pawimawhah te pawh an entir thin a, hnam lam hmang hian sum pawh an hailut tam viau tawh niin an sawi.
Agartala Mizo Welfare hruaitute leh member zingah sorkar hna sang tak tak thawk te pawh an awm a. Tripura sorkar kalphung tlangpui te sawiin, Mizoram lama lar tak restricted tender chu an hriat ve ngai loh thu leh eirukna kawngah pawh Tripura chu a la ziaawm viaua an hriat thu an sawi.
Hna tha lo deuh nia lang chu mipui lamin High Court-a an thlen nghal mai zel avangin hnathawktu thlan kawngah pawh diklo takin thil a tih theih loh tluk a nih thu an sawi a. Restricted tender phei chu tih ngam a nih loh thu an sawi bawk.
Sakhuana kaihhnawihah harsatna an tawh leh tawh loh zawhna chu harsatna an tawh ngai lem loh thuin Agartala Mizo Welfare hruaitute chuan an chhang bawk a ni.