- Ruata
South Korea company lar leh India ram market-a an lirthei nasa taka vawrh lar chho mek tu Kia chuan sub-4 meter SUV dang, Kia Clavis tihchhuah tumin hma an la mek a, India ramah an enchhin tan.
Kia Clavis hi ram danga an enchhin lai chauh hmuh tur a awm thin a. Tunhnaiah India ram kawngpuia an enchhin lai ngei hmuh tur a awm ta a. Hei hian India ramah pawh a chhuak har tawh dawn tih a tilang thei awm e.
Sawi angin sub 4 meter SUV huanga mi tho tur a ni a. Heti a nih chuan Kia Sonet te nen huang khatah an awm dawn tihna a ni a. Hyundai Venue, Maruti Suzuki Brezzza, Tata Nexon tih te ho huang kha a ni a. He huangah hian Kia in Sonet mai bakah lirthei dang a neih belh bik dawn tihna a ni thei awm e.
- Kia Clavis siam phung
An enchhina lirthei hi a thup nan an la khuh nasa viau a, Hetihrual hian a pian tlangpui tur leh a lirthei nihphung tur erawh a lang ruak thung a. Sonet leh Venue te pian lo ang deuhin he SUV thar tur hi chu a design hi a sang ur dawn a, box pian anga sawina ‘boxy design’ an tih a nei dawn a. A tung deuh ut bik dawn a, a chunglam pawh a lirtheia chuang te tan a thawl nawm hmel viau a ni.
A chung pawh a zawl dap mai dawn a, a hma grille leh a hnunglam design pawh a ngil at dawn a ni. Fourth-gen Kia Carnival MPV tea kan hmuh ang deuh diamond cut alloy wheel a hmang ang a. Sonet te pian lo ang deuha SUV tung sang at chi a nih dawn avangin tukverh lian zawk leh a chhung pawh thawveng halh mai a nei dawn a. Lifestyle oriented deuha an sawi a ni dawn a, duhtu pawh a rawn ngah viau beisei a ni.
- A khawl lam
Kia Clavis in a human tur khawl hi chiang taka sawi theih a la ni lo a. Kan han tarlan tak a nih phung tur hrang hrang pawh kha a thup thei ang bera company lamin an enchhinna atanga helam chhuitu media te report dan a ni rih mai a. Hetihrual hian petrol leh electric hmang a chhuah beisei a ni a. A ke hma phih kal (front wheel drive) a nih leh hmel bawk a ni.
- Tlangzarh hun tur
Petrol hmang Kia Clavis hi kumin kumtawp lamah an phochhuah hman beisei a ni a. Lei theih tura tlangzarh tak erawh chu kum 2025 kum tir lam a nih a beiseiawm thung a ni. Electric hmang ho erawh tun atanga thla ruk velah an tlangzarh mai beisei a ni thung a. Huang khata awm ni mah se, Sonet ai chuan a to hret a rinawm a, Sonet hi tunah hian Rs. Nuai 7.99 (ex-showroom) man bawr vel atangin a intan a ni.
Sub 4 meter SUV lirtheite hi India ramah, a bikin Mizoramah hian tunhnaiah market lamah a kal cher cher hle mai a. He huang hi Kia pawhin a tha a ni tih hriain an rawn zauh a nih hmel a. An ni chuan sub 4 meter huangah company dang ang lo takin Clavis an tihchhuah hunah chuan lirthei pahnih duhthlan tur an nei tawh dawn tihna a ni.
Clavis chungchang thui leh kimchang tak tarlan tur a la awm meuh lo a. A chanchin kimchang, design, kentel leh nihphung tur hrang hrang chu company lam atangin chiang leh dik zawkin kan hre chho zel dawn a. Chutihrual chuan SUV thar changkang leh mawi tak duhthlan tur a awm belh leh thuai dawn tih erawh a chiang tawh a ni.