Court of Special Judge (Prevention of Corruption Act) in tih luihnaa dan dik loa contract hna chhuhnaah leh sum tihchingpen thubuaia thiam loh a chantir Sujata Chakma chu kum 4 chhung jail tang tur leh cheng nuai 12 chawi turin a hrem.
Aizawl District Court-a Special Judge (PC Act) Dr HTC Lalrinchhana chuan nimin khan hremna hi a puang a, Sujata Chakma chu kum li chhung lungina tang tur leh cheng nuai 12 chawi turin a hrem a, a pawisa chawi tur hi a pe thei lo a nih chuan kum ruk (6) chhung lungin tan in a tlak dawn a ni.
Tarlan tawh thin angin, kum 2012 khan CADC in session hall sorkarna cheng nuai 232 chu sorkar atangin a dawng a, he hna thawk hian Contractor RV Hluna chu thlan niin, hall sak hna hi a thawk a, hall sak zelna tur sum 2nd installment dawn leh a nih hma in khatihlaia CEM Buddha Lila Chakma chuan tih luihna hmangin Contractor chu a hna chhuhsakin, power of attorney hmangin a nupui Sujata Chakma chu a thawh chhunzawm tir a, session hall sak hna hi an kutah awm tir mah se an chawlhsan vat a, heti chung hian CEM te nupa hian cheng nuai 34 chuang chu an ti chingpen tih finfiah a ni.
Eiruk thubuai ah hian Sujata Chakma chu thiam loh chantir a ni a, a pasal erawh a boral tawh avangin a thubuai hi tih tawp a ni thung.