MZP chuan thuchhuah siamin, ni 12 March, 2024 (Thawhlehni) khan Aizawl Municipal Coorporation (AMC) hnuaia Geologist-3 leh Urban Animal Husbandry & Veterinary Officer, Junior Engineer leh Asst Account Officer pakhat theuh lak danah dan kalha thiltih a awm ngeiin a hria a. Dan angin Advertisment chhuah a nih loh bakah, State sawrkar phalna an lak hriat a ni lova, danin a sawi angin MPSC emaw MSSSB kaltlanga lak a ni lo bawk. Chuvangin, heng hnalak dan dik lo hi MZP chuan March ni 15 ral hma ngeia sut turin AMC hotute a lo ngen tawh a.
MZP ngenna leh duhdan angin AMC Executive Council Meeting ni 15 March, 2024 (Zirtawpni) a thukhawm chuan, AMC hnuaia hnalak hrang hrangte a sut (revoke) a. Ni 18 March, 2024 (Thawhṭanni) hian sutna lehkha (order) hi tihchhuah a ni ta a ni, an ti a.
MZP ngenna ngaipawimawh a Aizawl Municipal Corporation (AMC) in, an hnuaia hna lak post 6 an cancel chu MZP chuan lawmawm a ti hle a. Mizoram-ah eng hna pawh dan ang zela lak a nih a, a thiam leh ting apiangte lak an nih hi MZP duhdan a ni. MZP chuan hna lak hrang hrangte hi uluk takin a enzui zel dawn a ni, tiin an thuchhuahah chuan an tarlang bawk.