March 18, Thawhtan zan khan 3rd NorthEast Olympic Games 2024 chu Regional Centre for Sporting Excellence, Sovima, Chümoukedima-ah ropui takin hawn a ni. Hawnna hunah hian Nagaland chief minister Neiphiu Rio chu khualzahawm a ni a, ani hi Nagaland Olympic Association-ah President a ni bawk.
NE Olympic Games 2024-ah hian Mizoram chuan inelna 14 a hmachhawn dawn a, inelna hmachhawn turin infiammi 181 te chuan March 18, thawhtanni khan Olympic Village an thleng kim. Mizoram in inelna a hmachhawn turte hi; Archery, Athletics , Boxing, Taekwondo, Wrestling, Wushu, Badminton, Basketball, Football, Sepaktakraw, Taekwondo, Volleyball, Tennis leh Table Tennis te an ni a.
Mizoram team hi Mizoram Olympic Association (MOA) in an buaipui a; Mizoram Chef de Mission hi MOA vice president Lallianthuama (Sentea) a ni a, Deputy CDM-ah Joseph Thansanga (MOA joint secretary) leh Lalduhkima Sailo (USAM general secretary) te an awm bawk.
NE Games 2022-ah Mizoram a chetha lo viau a, Gold Medal 16, Silver medal 30 leh Bronze medal 60 an la tling a, a pumpuiah pa 6-na an ni. Shillong khawpuia neih 2nd NE Games 2022-ah hian Mizoram atangin infiammi leh offical mi 336 an fehchhuak a. NE Olympic Games 2024-ah erawh infiammi 181 an fehchhuak ta thung.
- NE Games 2024 – Ni khatna
Football – Inelnaa Mizote ngaihven hlawh ber chu Football a ni fo a. Mizoram leh Manipur te inkhel phei chuan ngaihven a hlawh leh zual hle. NE Olympic Game 2024 ni khatnaa football inelnaa Mizoramin Santosh Trophy-a an hneh loh Manipur lakah phuba an la a, Manipur hi 4-0 ngawtin an sawp. Mizoram tan F. Lallawmkima’n goal hnih a khung bakah Malsawmfela leh Lalbiakhlua (Hlutea) ten goal khat ve ve an thun. Manipur lakah si li fai ngawta chak hi champion tluka lawmawm a ni der tawh. Mizoram hian tukin dar 9:00 hian Assam an hmachhawn zui leh dawn a, an chak a nih chuan group semi-final an lut chiang nghal ang.
Wushu : ITI Veng nula Lalmuanzami’n 52 kg-ah final a lut a, Mizoram tan medal pakhat chu a hmin phawt. Mipa inelnaah Vanlalremruata (52 kg), Nazareth Lalthazuala (56 kg) leh C. John Denise (70 kg) ten semifinal an lut. Hmeichhe final leh Mipa semifinal hi March 20, Nilaini-ah khelh a ni ang.
- Athletics & Lawn Tennis
Athletics-ah Mizoram a chetha tawk lova, ni khatnaah final lut phak an awm lo. Lawn Tennis-ah Mizoram an chetha rih.
- Hnung lam thlir ang
India hmarchhak State pasarih bakah Sikkim telin inelna neih a lo ni tawh thin a. North East Games Festival pawh Mizoram in a lo thleng tawh. Chutihlai chuan Manipur elpui lian ber chu Mizoram a ni. Chutihlai chuan, Mizoram leh Manipur in pakhatna nih an inchuh fal deuh tawp thin an ti, chutihlaia tha lo thawh tawhtuten.
North East Games Festival hnuah kum 2018 khan a vawikhat nan North East Olympic Games neih tan a ni a, Manipur in Inphal khawpuia Khumam Lampak Stadium-ah a thleng a. NEOG 2018 ah hian inelna chi 12-ah intihsiakna neih a ni a. A thlengtu Manipur chuan Gold Medal 79, Silver 47 leh Bronze medal 31 lain pakhatna an ni a. Gold Medal 45 lain Assam pahnihna an ni. Gold Medal pariat lain Mizoram chu pathumna an ni a, an chungchiahah Arunachal Pradesh an awm. North East Games Festival-a Manipui el phak deuh ber Mizoram chu Assam leh Arunachal Pradesh in an tlan pel der tawh.
Arunachal Pradesh in an thlen thei tak loh vangin Meghalaya chuan North East Olympic Games vawihnihna Shillong khawpuiah November 10-16, 2022 chhungin a thleng ve leh. NEOG 2022 ah hian inelna chi 18-ah intihsiakna neih a ni a, Gold medal 283 inchuh a ni. Mizoram elpui lian ni thin Manipur bawk an ropui nawn leh a, Gold Medal 88, Silver 75 leh Brone medal 77 laiin a vawihnih nan hmarchhak champion an ni nawn leh.
NEOG 2022 ah hian Mizoram ram chuan inelna zawng zawng a hmachhawn kim a, infiami leh offical mi 336 an fehchhuak. Beiseina sang tak nena inlan Mizoram hian Gold Medal 16, Silver medal 30 leh Bronze medal 60 an la tling a, a pumpuiah pa 6-na an ni. NEOG 2018-ah Mizoram hnuaia awm Meghalaya, leh Nagaland ten an tlan pel dawrh a. Tripura leh Sikkim te chungah an inham tang thei hram chauh.
NEOG 2024-ah Mizoram in hmasawn tumin tan a khawh mek a, NEOG 2024 zawh hunah hma kan sawn nge, kan tlahniam tih kan buk nawn leh dawn nia.