March ni 18, Thawhtan zan khan LPS Cup semi-final second leg khelh a ni a, Sihphir Venghlun VC team te chuan Bethlehem Vengthlang Local Council team an hneh nawn leh a, final an lut. Shiphir Venghlun hian nizana inkhel Kawnpui Jt VC leh Vaivakawn LC te inkhela chak zawk zawk final-ah an hmachhawn ang.
Inelna kal meka khel tha tluang tak, team lian tak tak lo dahtha tawhtu Sihphirh Venghlun hian semi-final thawh khatnaah Bethlehem Vengthlang hi 2-1 in an lo hneh tawh a, final an hnaih viau tawh. Semi-final thawhhnihnaah an khel tha sauh a, 3-1 a hnehna changin, si belhkhawmah 5-2 ngawtin hnehna an chang a, phu takin final an lut.
Semi-final thawh hnihnaah Bethlehem Vengthlangin bul an tan tha viau a, inkhel tan atanga minute thumna lekah Amos Lalnienga chuan hmahruaiana goal a thun nghal. Hma takah goal an thun vangin phur viau mah se an phur rei lova, goal an chhuah thuai. Sihphir Venghlun tan Joseph Lalthafela chuan minute 9-naah goal thunin an si phurh a sut. Hma taka goal hnih a luh vangin inkhel a hmuhnawm zui hle.
Inkhel a rei a, Sihphir Venghlun an khel tha tulh tulh. Lalmuansanga chuan minute 37-naah hma an hruai letna goal a thun a. Muansanga vek hian minute 64-naah an goal thumna thunin, an chakna a nem nghet zui leh bawk. 3-1 a an hnufual hnuin Bethlehem Vengthlang an thochhuak zo tawh lova, Sihphir Venghlun lakah tlawmin, final an lut zo lo.
Nizan dar 8:00 hian RG Stadium-ah semi-final hnuhnung zawk khelh a ni dawn a. Semi-final thawhkhatnaah si hnih faia hnehna chang tawh Kawnpui Jt VC in hnehna chang nawn leh ngei tumin Vaivakawn LC an hmachhawn ang.