- Dr. C. Lalrampana
A KAMKÊUNA
Rajiv Gandhi Government General Hospital hi India ram Chennai-a awm, Tamilnadu state hospital lian tak a ni a, Kum 1664-a British East India Company din a ni a, India rama damdawi in hmasa ber a ni.
Civil Hospital, Aizawl hi Mizoram sorkar ta a ni a, Kum 1896 khan Colonial India-ah ‘Coolie Dispensary’ anga din a ni a, kum 1906 khan damdawi in angin a lo thang lian ta zel a ni. “Durtlang Hospital” tia hriat lar hi Mizoram Presbyterian Kohhran Synod ta leh a enkawl a ni. He damdawi in hi kum 1928 khan Calvinistic Methodist Kohhran (tuna Presbyterian Church of Wales) chuan nursing institute atan an din a. Damdawi in puitling a lo ni chho ta zel a ni. Medindia’s Hospital Directory-in a tarlan danin Mizoramah damdawi in 96 a awm mek. Health & Family Welfare Department erawhin Sorkar damdawi in 11 leh pvt. Damdawi in 19 awm mek niin a tarlang thung. India ram pumah damdawi in 70,000 awmin pvt damdawi in 44 000 a awm mek.
DAMDAWI IN AWM CHHAN
Damdawi in hian kan nunah hmun pawimawh tak a chang a. Emergency care, surgery, leh specialized treatment-a inpe department-te nen, kan hriselna enkawlna mamawh hrang hrang an buaipui a ni. An pawimawhna chu nunna chhanhimnaah te, hriselna tihhmasawn te, leh damdawi lam rawngbawlna pawimawh tak tak peknaahte a innghat a ni. Doctor-te’n damdawi lam enkawlna chu an vil a, an enkawl bawk. Nurse-te hian inenkawlna damdawi an pe thin. Allied health professionals te hian natna hmuhchhuah leh enkawlna kawngah tanpui turin service an pe a, damlehna kawngah pawh damlote an pui bawk a ni. Support leh administrative staff-te hian nitin damdawi in kalpui dan tur an ruahman thin. General hospital chu academic health facility emaw, khawtlang nunah emaw pawh a ni thei. Medical leh surgical case chi hrang hrang an admit avangin general an ni a, acute illnesses nei damlo, hun rei lote chhunga enkawl ngaite chenin an ngaihtuah ber a ni. Damdawi in tel lovin hringnun a famkim thei lo a ni ber mai. Dam tawpa thih hmabak theuh mah ni ila damdawi in awm avanga dam chen tur dam thleng an tam phah hle a, dam chen tur ban phak loh phahte pawh an awm ve tho bawk niin a lang. Damdawi in chhiatpui engemawzat an awm laiin a tam zawk 95% te chuan dam nan kan hmang mek a ni. USA-ah khuan kumtin damdawi ina thi hi mi 700,000 zet an tling. Hmun tinah damdawi ina thi aiin mahni in luma thi an tlem zawk fe a ni. Hei hian damdawi in kan mamawhzia a tilang chiang hle.
AN TISUAL VE THEI
Hriselna lama thawktute hi mithiam tak tak awmkhawm ni mah se, mihring ve tho an nih avangin tihsual an nei ve thei vek a, an fel famkim bik lo a ni tih hriat a pawimawh. Hetih lai hian tunhma atang tawhin mipuiin damdawi lama thawktute tihsualah sawisel kan hreh a, an diklohna chiang taka kan hriat reng pawh sawisel ngam lovin kan hlauh tlawn fo zawk niin a lang. Hei vang hian thawktute pawh an inluling deuh thin emaw ni tih turin an awm ve fo bawk. Karnataka hmarchhak lam Bidar-a doctor 3 leh nursing home-a thawk pakhat chu kum 2014-a hmeichhe kum 40 mi thihna thlentu medical negligence vangin jail tang turin court chuan a hrem. Mizoram State Consumer Dispute Redressal Commission (MSCDRC) pawhin nu pakhat leh a fahrin thihna avangin New Life Hospital chu Rs. 43,48,480 chawi turin a lo ti tawh bawk. Tun hnaiah Lalfakzuala (Faktea) Kum 12 s/o T. Lalchhuanmawia, Ruallung boral danah medical negligence awm nia hriat a nih avangin Ruallung VC leh All NGO chu an lawm lo hle. Lalfakzuala (Faktea) hi Ni.11.03.2024 (Thawhtanni)-ah in Check-up turin Aizawl-ah a nuin a kalpui a. Hemi ni tlai lam hian ENT Specialist-ah Check-up a ni a, ENT Doctor hian a Tonsil zai a ngaih thu a lo hrilh a, Sikul chawlh laia intihfel hman an duh si a. Ni.12.03.2024 (Thawhlehni)-ah LRM Doctor an rawn leh a, a tuk Ni 13.03.2024 (Nilaini)-ah zai theih a nih thuin an lo chhang a, zai a nih hnu lawkah a boral ta a ni. Faktea thih chhan hi LRM Hospital chuan Malignant Hyperthermia niin an sawi a; mahse, Ruallung VC leh All NGO-te chuan a thih chhan hi pawm har tiin hriatthiam a har an ti a, en liam mai mai an tum lo a, an beisei ang hmalakna an hmu lo a nih chuan a tul angin hma lak zel an tum niin a lang. He thihna pawh hi medical negligence niin a lang. Thuneituten an la finfiah turah ngai ila a tha awm e.
MEDICAL NEGLIGENCE HREMNA
Medical Negligence avanga thihna thlen, Mi tu pawh tihhlum tumna emaw, ngaihsak lohna emaw thil tih avanga tualthahna thiam loh chantir chu kum hnih thlenga lung ina tantir emaw, pawisa chawi emaw, a pahnih emaw hmanga hrem a ni ang.”. Section 337, IPC. tih te; Tunah hian Indian Penal Code, 1860 Section 304A hnuaiah ngaihsak lohna avanga thihna thlentu hremna chu kum hnih chhung lungin tan leh pawisa chawi emaw a pahnih emaw a ni. tihte leh Mihring nunna emaw, midangte himna emaw tichhe thei khawpa thil tih chu hmanhmawh vang emaw, ngaihsak loh avanga mi tu chungah pawh hliam na tak a thlen chuan, kum hnih thlenga lung ina tantir emaw, pawisa chawi emawa hrem a ni ang. Section 304A, IPC-ah chuan, “Negligence avanga thihna thlen. Mi tu pawh tihhlum tumna emaw, ngaihsak lohna emaw thil tih avanga tualthahna thiam loh chantirtu chu kum hnih thlenga lung ina tantir emaw, pawisa chawi emaw, a pahnih emaw hmanga hrem a ni ang.” Doctor leh damdawi lama thawktute’n dam lo an ngaih thah emaw, an enkawl dik lo a nih chuan damlovin law court-ah vuivaina a thlen thei. Mizote erawhin Kristian kan nih chhuan lamin inhriamthiamna sang tak kan nei a, hei vang hian inkhinbuaina a tlem phah a ni.
A TLÂNGKAWMNA
Sikul Education Department-in sorkar sikul leh private sikul a nei hrang angin Health & Family Welfare Department pawh hian sorkar damdawi in leh pvt. Damdawi in a nei hrang a, an service erawh a tha tlangpui a, mahse, medical equipment & facilities leh infrastructure-ah erawh an inang vek lem lo. Sorkar damdawi in bik hian Siaha, Lunglei, Serchhip leh Aizawl Damdawi inahte hmingchhiatna a lo tawk zeuh zeuh tawh a. Pvt. Damdawi in hian Aizawl (Newlife Hospital) etc.-ahte medical negligence a awm tawh nia a lan bakah tunah LRM Hospital-in a lo hmachhawn veleh ta mek hi thil mak tehchiam a ni lo. Hospital dang dangte pawhin an lo tawk fo tawh anga, mipui lamin kan khing let zel lem lo mai zawk niin a lang. Hei hian mihringte kan famkim lohzia leh tisual thei kan nihzia a tilang chiang hle. Pathianah chauh lo chuan famkimna a awm lo. Khawvel changkang chho zelah hetiang harsatna hi kan la tâwk chho zel pawh a ni thei. Mipuite pawh kan fing chho ve zel a, kan dikna chanvo humhalh lamah kan fingvar tial tial a; chuvangin hriselna lam enkawltute pawhin heng harsatna lo awm thinte hi fimkhur lehzual nan hmang se, an diklohnaah insawithiam talh tum lovin an diklohna huaisen takin pawm ngam mai se, chutiang bawkin mipui pawhin rinthu leh dawt phuah belhin puh chhiat luih talh ching lo bawk ila inhmangaihtawna indawhtawnin inngeih dial diala khawsakho zel theih ni se a va nuam dawn êm! Eng kawng pawh zawh ila sumdâwnna behchhan (commercial basis) vek a ni tawh. Zirna chihrang hrang lleh thiamnate pawh hi commercial basis vek a ni tawh a, chutiang bawkin damna rûn leh chahintha puandarh thleng hian commercial basis vekin kan kalpui mek tawh niin a lang. Chuvangin, tute nge dika tutenge thiam? tih hi hriat thiam a va har ta êm! Engpawhnise, dikna leh rinawmna hi kan vawn nun tlat chuan buaina kan tawh tam takte hi sutkiansain a awm tihna a lo ni e.