- Mahmuaka Chhakchhuak
Kalvari tlang tih hi chuan kan thinlungah hian a fiah em em nghal mai a, hei hi a chhan ni bera hriatah chuan Pathian fakna hla kan neih tam takahte hian ‘Kalvari tlang’ tih hi a lan tam vang a ni mai thei e. “Aw ka thlarau chu tlangah chuan chhun zanin va leng fo la, i Lalpa kraws lera awm chu nungin i va hmu ang, Kalvari tlang chanchin a lo hrilh ang che”, “Thumak ka sawi nin theih loh chu Kalvari chanchin a ni, engtin nge Pathian fa mal chu misual ka tan a lo thih”, “Sawi nawn leh rawh, min hrilh leh rawh, Isua’n ka tan a tuarna kha!” tihte hian kan thinlungah hmun a chang thuk em em hlawm. Kalvaria hmangaih lo lang kha tihte Kalvaria hnehna ropui chu tihte leh Aw Kalvari thing chungah chuan ka hreng ropui a au ti leh Kalvari tlang ka hahdamna tih hlate pawh hian kan thinlung a hneh hle thin.
Tawng thenkhata “Kalvari” sawi dan han thlir ila:
Greek; Kranium
Aramaic; Gulgutha
Latin; Calvaria
English; Skull
Hebrai; Gulgoleth
French; Cavalerie
German; Kavallerie
Russian; Kavaleriya
Kalvari tlang chu kan hriat theuh angin Kan Lalpa Isua khenbehna hmun a ni a, engvanga Bible hrang hrang te’n ‘Luruh hmun‘ tih te, ‘Golgotha‘ tih te ‘Kalvari tlang‘ tih te an an ziah chhan hi hre lem lo mah ila hetiang hian i han sawifiah dawn teh ang.
Hebrai tawnga ‘Gulgoleth’ tih chu Ror. 9;53 leh II Lalte. 9;35 ah kan hmu a, chu chu English hoin “Skull’ tiin an letling leh ta a ni. Mizo tawng chuan ‘Luruh hmun’ tihna a ni. A tlang pumin Luruh a an vang pawh a nilo a, a hma lam chhawngin mihring luruh a an avangin Luruh hmun an ti ta mai nia sawi a ni. Hmalai atang tawhin Misual hremna hmun atana an hman tawh a nih avangin helai hmunah hian an phum thin a, an ruhro tam tak a awm avanga Luruh hmun tia sawi a ni ti pawh an awm bawk.
Golgotha tih hi Aramaic tawnga gulgutha tih atanga lo kal a ni a, Luruh tihna a ni. Mat. 27;33, Mk. 15;22, Joh. 19;17 ah te hian Golgotha tih hi hman vek a ni. Commentary pakhat chuan hetiang hian a sawi a ‘ Josepha, Arimathai khua ami chuan helai hmun hi huan atan a nei a, Thlan a laichhuak a, chu thlan chu a hnu ah chuan Adama an phumna hmun nia sawi a ni nghe nghe a, thlan chhunga Luruh atang chuan thisen hi alo farchhuak a, tichuan kum zabi 4 na hunlai chuan chulai hmun ah chuan Thlan Thianghlim Kohhran (Church of the Holy Sepulchers) an din a, St. Cyril of Jerusalem pawhin a rawn sawi thawi ve bawk a, Eusebius hunlai pawhin a dik zia an hre bawk a ni.
Bible hrang hrang te’n Lk. 23;33 thu an sawi dan hi lo en ila;
Calvary: KJV-1611, Coverdale, AKJV, Bishops, CPDV, ERV, ESV, LONT, WOY, EVID, Julia, BWE, SSE, WEL, TRC, Matthew, MKJV 1962, RNKJV, Douay Rheims, Tyndale, UKJV, LXX, MSTC, Webster, Wycliffe, WT NT, LHB, KJ2000, EMTV, Great, DRC, WBE, KJV, EWB-CB, BB, Geneva, BSV, CAB, DRB, KAN LALPA LEH CHHANDAMTU ISUA KRISTA THUTHLUNG THAR,
Luruh hmun; ASV-1901, AMP, CEV, GSNT, HRB, YLT, IAV, ERV, LEB, Mizo Bible, CNT, SENT, HNV, NET, UTV, NIV, OJB, Darby, ISV, NHEB, The Massage, Easy English, OEBUS, WEB, EBR, CLV, CGV, FAA, Etheridge, NHEBn, JB2000, KJ3, MLV 2015, The Scriptures 1998, Rotherham, ARV 2005, AUV, ALT, ANT, AS, ESV, RV, LB, HMAR BIBLE, ERV, BIBLE THIANGHLIM,
Golgotha; BBE, TS2009
Hetiang hian Luruh hmun, Golgotha tih leh Kalvari tihtein sawi lo ni mahsela keini Mizo kristiante tan chuan danglamna engmah a awm chuang lem lo. Aw tlang mawi Kalvari, miten hmusit mahse tlang dang zawng zawng aiin kei zawng ka ngaina hle, Aw hlimna tlang, aw hmun thianghlim, Pathian thisen a luanna chu tiin Rev. Liangkhaia chuan hla tha taka lo siam tawh a. Chutiang bawkin Pastor Chhawna pawhin ‘Aw Kalvari thing chungah chuan’ tih hla a phuah pawh hi kan hla ropui berte zinga chhiar hmaih rual loh tur a niin kan thinlung pawh a hneh ngaiin ala hneh reng fo bawk. He hlaa a thunawn – Aw, ka sawi thei lo, Aw ka hril thei lo, A hmangaihna a van mak em! Thukna, thukna, ka sawi thei lo, Min hmangaih a va mak em! a han tihte hian thinlung a vit raih mai. He hla a phuahchhuah dan pawh hi ngaihnawm tak a niin Thentlangah a hlim rui chu tawnghriatlohin a zai a, chutia tawnghriatloha a zai chu heti hian hlain a zuk siam ta mai nia sawi a ni.