March ni 5 atanga ni 20 chhung hian Bhartiya Bhasha Manch leh Bhartiya Bhasha Samiti (Ministry of Education, Gov’t of India) tangkawp chuan India Tawng Inkhawmpui (Bhartiya Bhasha Sammelan) chu India ram zirna insang hmun hrang hrangah a huaihawt mek a. Mizoramah pawh ICFAI University Mizoram Durtlangah he hun hi thawhtanni khan an hmang.
Chief Guest atan Prof. Vajay Kumar Singh (Registrar, Sarala Birla University, Ranchi, Jharkhand) chu hman a ni a. Distinguished Guest atan Prof. Hitendra Masha (Head, Department of Hindi, North Eastern Hill University, Shillong) hman ni bawkin, Special Guest-ah Padma Shri Laltluangliana Khiangte, Senior Professor, Department of Mizo, Mizoram University chu hman a ni bawk.
Hemi hunah hian University leh College lama Professor rualte leh mi thiam tak takte sawmin tawng zirhona hun an hmang a ni. Tin, Mizo tawng leh a peng hrang hrang te pawh India tawng a nih avangin zirna in leh ni tin nuna hman uar deuh deuh a pawimawh thute sawi a ni a. Mi thiam thuziak hrang hrang zirho a ni bawk.
Bhartiya Bhasha Sammelan hi India ram chhunga India tawng hrang hrangte vawrh larna leh humhalhna programme a ni a, India tawng phochhuahna leh zirhona inkhawmpui a ni.