Ningani zinga NBA regular season khelhah Eastern Conference hmahruaitu Boston Celtics chuan Milwuakee Bucks an hneh. Inkhel dangah Miami Heat in Cavaliers an hneh ve bawk.
Eastern Conference hmahruaitu Boston Celtics hian an khingpui Milwuakee Bucks lakah an khel tha viau a, point 13 zeta hmahruai chungin chawlhlawk an hmang. Chawlhlawk hnu lamah pawh an khel tha chhunzawm a, quarter thumnaah ngain an chungnung zui leh a, quarter hnuhnung ber an hmachhawn dawn meuh chuan point 18 zetin an chungnung a, chak tur a chiang tawk viau tawha ngaih a ni.
Celtics nen an inkar zau viau tawh mah se Bucks an hnual lova, quarter hnuhnung berah chak ngei tumin thapui an thawh. Quarter linaah hian an khingpuite an dang bet a, an ni lamin point an thawkchhuak zawn mawlh mawlh thung. Quarter hnuhnung berah hian point 15 ngawtin chungnung mah se Celtics hi point thumin an umphak zo lova, uiawm takin tlawm zawkah an tang ta tho a ni.
Bucks laka chak Boston Celtics hi vawi sarih an chak zawn ta chiah a, Eastern Conference-a an hmahruaina an sawh nghet. Celtics hian season kal mekah vawi Miami 55 hnehna an chang tawh a, vawi 14 tlawm zawkah an tang ve thung. Bucks an hneh tum hian Jayson Tatum chuan point 31 a thawkchhuak. Bucks hi an player pawimawh Giannis Antetokounmpo tel lovin an inlan a. Damian Lillard-an point 32 thawkchhuak in, Bobby Portis chuan point 24 thawkchhuak bawk mah se Celtics an hneh zo chuang lo.
Inkhel dangah Miami Heat chuan point 107-104 in an khingpui Cleveland Cavaliers an hneh a. Ningani zing hian Sacramento, Indiana Pacers leh Oklahoma City ten hnehna an chang bawk.