Football khawvelah San Marino an chak thei lo tluang zel a. March 20, Nilai zana an khingpui Saint Kitts and Nevis lakah 3-1 a tlawm lehin an khelh hnuhnung vawi 202 atangin a vawi 193 na atan tlawm zawkah an tang. Khawvela ram hrang hrang zingah football a chak nei lo rei ber an nihna an tlin ngar ngar viau a, kum 20 chhung zet chak ni hmel an hmu thei ta lo.
San Marino hian St. Kitts and Nevis lakah goal an thun hmasa ve teh mial a, minute 21-naah Fillipo Berardi chuan penalty atangin an hmahruaina goal a thun. Goal thun hmasa zawkah an tan vangin chak ni hmel an hmu ve dawn ta nge nge a ngaihna a awm hman a. Chak tum viau mah se goal thum an chhuah zawn a, tlawm zawkah an tang leh ta tho.
Goal chhuah hmasa zawka tanga Saints Kitts and Nevis tan hian Tyquan Terrell chuan minute 31-naah goal thunin an si phurh a sut a. Andre Burley leh Harry Panayiotou ten goal an thun belh leh bawk a. An khingpui San Marino chu 3-1 in an lehthal. Kum 20 chhung zet chak ni hmel hmu tawh lo San Marino hi Fifa ranking-a hniam ber an ni a. Nilai zana an khingpui St. Kitts and Nevis te hi an chung 63-naa awm an ni. Saints Kitts and Nevis lakah an tlawm leh tak vangin vawi 137 an chak loh zawnna a ni a. An hneh hnuhnun ber chu Liechtenstein an ni.