3rd NorthEast Olympic Games 2024, Nagaland-a neih mekah Mizoram in Ningani khan hma a sawn hret a, TT atangin Gold Medal a lak belh. Ningani hian Volleyball Mizoram a chak nawn leh a. Boxer parukin final an lut bawk.
Ningani a he thu buatsaih lai thleng hian Mizoram chuan Gold Medal pakhat a lak belh a. NEOG 2024-a Mizoram Gold Medal palina hi Jeho Himnakulhpuingheta hlawhchhuah a ni.
Jehova hian final-ah Manipur aiawh a Khelendrajit a hmachhawn. Final hmuhnawm takah Johoo-a’n bul a tan tha tawk lo va, set a hloh hmasa. Mizoram elpui lian Manipur lakah set hloh hmasa mah se huaisen takin a inlan zui a, a phu ang ngeiin set hnih a la zawn. Final boruak sang takah Jeho Himnakulhpuingheta hian a khingpui Khelendrajit hi 9-11, 11-7, 11-6 leh 11-8 in a hneh a, Mizoram tan Gold Medal a la. TT atang hian Alberto chuan Bronze Medal a hlawhchhuak ve bawk.
Jehova leh Alberto te inkawp hian Doubles final an lut a. Final-ah Assam an hneh lova, Silver Medal an la.
- Boxing-ah medal paruk a hmin
Mizoram aiawh turin boxer 17 an fehchhuak a, chung zinga boxer 13 te chuan semi-final an lut. Ningani khan semi-final khelh a ni a, boxer paruk; mipa pali leh hmeichhia pahnihin sem-final an lut. Boxing atang hian medal 13 a hmin tawh a. Gold Medal paruk lak belh thei dinhmun ah Mizoram a ding mek bawk. Final lut parukte hi an chak vek a nih chuan medal tally-ah Mizoram a kang awk ang.
- Mizoram 3-0 Manipur
Volleyball-ah Mizoram an chungnung zui zel. Tripura leh Meghalaya an sawp hnuin group math hnuhnung berah Manipur an sawp zui leh a, Group champion ni chungin semi-final an lut. Semi-final an luh thlengin Mizoram hian an ter phah deuh an la tawng lova, Volleyball atangin Gold Medal lak a beiseiawm viau rih.
Mizoram hian vawiin chawhma dar 9:00 hian Semi-final ah Sikkim a hmachhawn dawn a. An chak a nih chuan Assam leh Manipur te inkhela chak zawk zawk final-ah an hmachhawn zui leh ang a. Volleyball inelna hi vawiinah zawh fel a ni ang.
Taekwondo : Taekwondo-ah Lalrinngheti Sailo leh Vanlalthlamuanpuii ten silver an la a, B. Malsawmzuala’n bronze a la thung. Nizan khan Lalhmingsanga leh H. Vanlalfela ten final an khel a. Result kan tarlang hman lo.
Wrestling : Mizoram in Gold Medal lak tam a beiseina zinga mi Wrestling chu vawiin atangin neih tan a ni dawn a. Mizoram aiawha fehchhuak Wrester te inelna hmachhawn turin an phur tawh hle.
Football : Manipur leh Assam hneh tawhtu Mizoram in Group B-a pahnihna Arunalchal Pradesh chu chawhnu dar 2:00-ah an hmachhawn dawn a. Final an lut a nih chuan Inrinni chawhnu dar 2:00-ah final an khel ang.
He thu buatsaih lai thlengin Mizoram in Gold Medal 4, Silver 5 leh Bronze 13 a la tawh.