Mizo Hmeichhe insuihkhawm pawl, Tuivai Block chuan nimin khan Phullen-ah Block Conference an hmang a, MHIP General Secretary Lalliani leh hruaitu dang ten an hmanpui.
Khuallian Lalliani chuan, Mizoramah hur sualna in hmun a luah hneh tawh thute, hmeichhe naupangte chu an in chhungah ngei pawh an him lo a, an pa hrawn te leh an chhungte dang te’n an pawngsual thin tih a sawi a, hetiang thil duhawm lo tak thleng thin chu pawi an ti hle tih a sawi a, hetiang sualna rapthlak laka hmeichhia te an himna turin chhungkaw nu in mawhphurhna lian tak a nei tihte, mitin in hetiang sualna a thlen lohna tur hian mahni thenawm te chin an hriat a tul hle tih a sawi.
Heng bakah hian nu ho kalkhawmte chu kum upa te enkawl kawngah theih tawp chhuahah, duat thiam turte, an fate chu hnathawh hreh lo tura zirtir a, mipa leh hmeichhe hna bik a awm lo tir zirtir turte a chahin, faina kawngah pawh an tu leh fate zirtirtu ni zel turin a chah bawk.
MHIP Tuivai Block Conference vawi 9-na hi Nilaini khan neih tan a ni a, nimina vantlang inkhawm an neihah an member boral te sunna hunte, hruaitu hlui chawimawina hun te hmangin, chawhnu ah lengkhawm zai intihsiakin hun an hmang chhunzawm leh a ni.