NE Olympic Games 2024 neih meka Volleyball inelna bikah Mizoram an vawk lal len a, set khat lek pawh hloh lovin an champion. Mizoram hian group match-a an sawp tawh Manipur chu final-ah an sawp nawn leh a, phu takin an champion.
Mizoram hian zirtawpni chawhma lamah semi-final an khel a, inelna thlengtu Nagaland an hmachhawn. |antu nei tha Nagaland lakah chungnung takin an inlan a, Nagaland hi 25-20, 25-19, 25-16 a sawpin final an lut. Final an luh thleng hian Manipur, Tripura leh Meghalaya te an hmachhawn tawh a, Mizoram in set hloh a la nei lo.
Final hi zirtawpni chawhnuah khelh chhunzawm nghal a ni a, 3-0 a Assam sawptu Manipur leh Mizoram in final an khel. Group match aiin Manipur an khel tha hret naa Mizoram an chai hleithei chuang lova, thin tiphu tham an awm meuh lo a ni ber mai. Mizoram in a thunun final-ah hian 25-16, 25-20, 25-21 in Mizoram in hnehna an chang a, an phu ang ngeiin Gold Medal an la.
Tarlan tawh angin NEOG 2024 a Volleyball inelna bikah Mizoram chhing zo an awm lova, an tha filawr hle. Mizoram hi an champion a ni satliah lo, Mizoram lakah set khat lek pawh la thei an awm lo hial. Mizoram Volleyball Association in Volleyball hmasawn nan theihtawp an chhuah a. Inelna ngaihhlut hlawh tak Pro-Volleyball League an buatsaih a, inelna hrang hrang a lo awm neuh neuh bawk nen tunah zet chuan hmarchhakah Mizoram a chungnung ta hle.
- Mizoram in Manipur an sawp
Volleyball ah Mizoram in Manipur a sawp ang bawkin Basketball-ah pawh Mizoram in Manipur an sawp a, final an lut ve bawk.
Mipa lama champion lai Mizoram hian semi-final-a an khingpui Manipur chu awlsam takin an hneh a, Gold Medal la nawn leh turin vawi khat chak chiah an mamawh tawh.
- Football final
Infiamna ngaihhlut hlawh Football-ah pawh Mizoram an chungnung zui zel a, 2-0 a Arunachal Pradesh hnehin final an lut a, Manipur nen Gold Medal an inchuh zui leh dawn.
Mizoram hian Arunalchal Pradesh lakah an khel tha zui leh viau a. Ramngaihsanga leh Malsawmtluanga te goal thun hmangin Arunachal Preadesh an hneh a, final an lut.
Semi-final lehlamah Manipur chuan a thlengtu Nagaland lakah si an phurh hmasak zet hnuin 2-1 in hnehna an chang let a, final an lut.
Final-a intum tur Mizoram leh Manipur hi group match-ah an lo intum tawh a, Mizoram in 4-0 ngawtin hnehna an chang. Mizoram lakah an mualpho hnuin Manipur an insiam tha a, an player thate an koh belh bawk. Final-ah Mizoram hneh ngei an tum dawn a. An tlawm nawn leh a nih chuan mualphona khua a zau dawn lutuk a, Mizoram hneh turin a theihna sang ber an hlan ang. Major Games-a an ngam loh Mizoram hi football-ah hneh hram dan kawng an dap ang. Mizoram pawhin an hneh tawh lakah tlawm an tum dawn hauh lo va, Gold Medal lak nawn leh ngei an tum hle dawn bawk.
- Badminton in Gold lak belh
Zirtawpni hian Badminton atangin Mizoram in Gold Medal a la hmasa ber a. Mixed Doubles-ah C. Lalramsanga & Lalrempuii te inkawp chuan Nagaland aiawh Vikhietuo Kense & Shekhotolu Puro te inkawp chu 21-17, 21-13 in an hneh a, Gold Medal an la.
- Wrestling atangin medal paruk
Wrestling atangin Mizoram in Zirtawpni khan medal paruk an la a, medal an lakte hi Gold 2, Silver 1 leh Bronze 3 te an ni.
Free style Wrestling atangin B. Lalawmpuia (57 kg) leh Remruatpuia (79 kg) ten Gold Medal an la a. Lalrinfeli (55 kg) in Silver Medal a lak bakah Vanhnuaithanga (74 Kg), Johny Lallawmkima (65 Kg) leh Lalchhanhima (70 Kg) ten Bronze medal an la bawk.
Wrestling atang hian Mizoram in medal a lak belh ngei dawn a. Belt Wrestling lamah Gold Medal lak beiseina sang tak a la awm.
- Naom-i’n Gold Medal hnekchhuak
Zirtawpni vek khan Boxingah Naom Chinsanmuan chuan 54kgs category ah Mizoram tan Gold Medal a hnekchhuak. Boxing atang hian Malsawmtluanga &75kgs) chuan Gold Medal a la bawk.