March 22, Ningani zan khan Euro 2024 khel tur zawnna hnuhnung play-off khelh a ni a, Finland hnehin Wales in final an lut. Wales hian khingpui hautak zawk an nei zui leh dawn a, Poland nen inelna lian khelh an inchuh zui leh dawn.
- Wales 4-1 Finland
Play-off semi-final-ah Wales hian Finland an hmachhawn a, Cardiff City Stadium-ah 4-1 a hnehna changin final an lut.
Wales hian an mualah bul an tan tha viau a, goal pawh an thun hma hle. Inkhel tan atanga minute thumna lekah David Brooks chuan hmahruaina goal a thun nghal. Hma takah goal an thun vangin an phur a, an mikhual lakah hian an khel tha zui viau nghe nghe. Chawlhlawk dawn hnaih minute 38-naah Neco Williams chuan an goal hnihna thunin an hmahruaina a tizau a. Goal hnih an chhuah hnu lawkah Finland tan Teemu Pukki chuan minute 45-naah goal thunin an si phurh a sut then a. Wales hian 2-1 a hmahruai chungin chawlhlawk an hmang.
Chawlhlawk hnu lamah Wales an khel tha chhunzawm a, goal an thun belh thuai. Second half tan atanga minute hnihna lekah Brennan Johnson chuan an goal thumna thunin, an hmahruaina a tizau nawn leh a. Hun tawp dawn hnaih minute 86-naah Daniel James chuan an goal lina thunin an chakna a nem nghet. Hun tawp thlengin goal dang a luh belh tawh lova, 4-1 a hnehna chang Wales in final an lut.
Wales hmachhawn tur Poland hian PGE Narodowy-ah Estonia an mikhual a, an mualah 5-1 ngawta hnehna changin, final an lut.
Poland hian an mikhual Esonia lakah tam zawk an nih an chawr tangkai viau a, chawlhlawk hnu lamah goal li ngawt an thun. Poland tan hian Przemyslaw Frankowski chuan minute 22-naah hmahruaina goal a thun. Poland lakah si an phurh hnu lawk minute 27-naah Estonia player Maksim Paskotši hnawhchhuah a ni. An muala ngei tam zawk ni bawk mah se Poland in goal an thun belh thei mai bik lova, 1-0 a hmahruai chungin chawlhlawk an hmang.
Chawlhlawk hnu lamah Poland an khel tha ta viau thung a, goal li an thun belh. Piotr Zielinski chuan minute 50-naah an goal hnihna a thun a. Jakub Piotrowski goal thun hnuin Estonia player Karol Mets chuan an lamah a ti-goal bawk a. Poland goal hnuhnung ber hi minute 76-naa Sebastian Szymanski thun niin, Estonia goal neih chhun hi minute 78-naa Martin Vetkal thun a ni ve thung.
Wales leh Poland te hi March 26, Thawhleh zan khian Cardiff City Stadium-ah an inhmachhawn dawn a. An muala inlan tur an nih vangin Wales hian chak theihna hun tha an nei tura ngaih a ni.
- Greece an chak chiang
Play-off semi-final dangah Greece chuan an mikhual Kazakhstan chu 5-0 ngawtin an sawp a, Georgia hmachhawn leh turin final an lut. Greece tan hian Anastasios Bakasetas, Dimitris Pelkas, Fotis Ioannidis leh Dimitrios Kourbelis ten goal khat theuh an thun a. Kazakhstan player Erkin Tapalov chuan an lamah goal khat a ti lut ve bawk.
Greece hmachhawn tur Georgia chuan an khingpui Luxembourg chu Budu Zivzivadze goal hnih thun hmangin an hneh a, final an lut ve bawk.
Semi-final dangah Iceland chuan 4-1 in Israel an hneh a, Ukraine chuan mikhual an nihna hmunah 2-1 in Bosnia and Herzegovina an hneh ve bawk. Iceland leh Ukraine te hian March 26, thawhleh zanah final an khel zui leh ang.