Congress Vice president Lalnunmawia Chuaungo chuan BJP-in kristiante chu hnawk a ti hle a, BJP sorkarna Assam ah pawh tawngtai tihdamna rawngbawlna te pawh khap a ni tawh dawn tih a sawi.
Nimina Aizawl Press Club-a thuthar thehdarhtute a kawmnaah Lalnunmawia chuan, Assam Legislative Assembly chuan kumin February ni 26 khan The Assam Healing (Prevention of Evil) practices bill 2024 a pass thu sawiin, he dan hi hman a nih chuan kan ramthima rawngbawltu ten tawangtai a tihdamna rawngbawl an neih thin te chu khap a ni tawh dawn, a ti.
Kumin Lok sabha MP inthlan lo awm turah hian BJP in sorkarna an chang leh a nih chuan Assam mai ni lovin state dangah pawh an pass ve zel lovang tih sawi theih a nih loh thu a sawi a, BJP thil tum ber chu India ram chu Hindu rama siam a nih thute, chumi avang chuan Kristian te hnawk an ti hle a; kawng tinrengin harsatna an siam sak thin tih a sawi.
Lalnunmawia Chuaungo chuan Indian National Congress (INC) chu Indian National Democratic Inclusive Alliance (INDIA) hruaitu leh eptu party lian ber a nih thu sawiin, Lok Sabha inthlan lo awm tura BJP kawng daltu lian ber a nih avangin Centrala BJP sawrkar hian hmanraw hrang hrang in a bei mek a, Income Tax Department leh Enforcement Directorate chu diklo taka hmanrua a hmangin, INC sum hnar a chhut chah sak tih a sawi a, hetiang karah hian INDIA chu a sawh muk chho zel a, he thawhhonaa tel te pawhin bial hrang hrang an in sem fel chho zel a, sorkarna pawh an siam ngei an beisei tih a sawi.
Mizoram Congress party chhungkaw chungchang zawhna chhangin MPCC vice president chuan, an party chhungkuaah buaina a awm lo a, an inkuangkuah fel tawh a, OB post chuh tu tling lote kha tuna MP inthlan lo awm tura an star campaigner te an nih thu sawiin, inlungrual takin inthlan lo awm tur hi an hmachhawn ho mek tih a sawi bawk.