- Lallunghnema, Charity Lodge
Consumer Huang min lo hlutsak a, min lo chhiarsak thintute chibai ka buk a che u. Pathianin malsawmna tamtakin a vur ang che u. Duhsakna pawh ka hlan mawlh mawlh a che u.
Sumdawng chaltlai hmachhawn turin huaisen a ngai ber. Mi dawihzepin misual an ep ngam lo. An hma bak chu ‘tlanchhiat’ a ni mai. Chuvangin huaisen takin thil tha lo leh mi tha lo, bum hmang daw thei te lo hmachhawn ngam ang che. I la nihlawh ngei ang.
Nikum 2023 khan Consumer Article hi vawi 45 vel ka ziak a. Zozam Times ah hian Thawhtanni apiangin ka ziak thei. Vawi khat mah ka bahlah miah lova. Ka lawm em em a ni!
Heng ka article-te lo tangkaipuitu an awm zel a ni tih ka hriat phei chuan lawmin ka luang liam thin a ni.
- Programme tan hma leh a behbawm :
Kumin hi chuan Mizoram Govt. Law College lama World Consumer Day hman ka ril rûk deuhva.He ka rilru chungchangah hian Law College hotu nu Dr. Maria-i pawh ka bia a. Mahse,Law College-ah he Ni hian Programme duan lawk a lo awm hlauh mai a. Chuvangin kan ti thei ta lova. Mahse,Sawrkarin ka rin loh lam Lunglei-ah ATI hotute kal tlangin min kâp chhuak ta zawk a ni. ATI hotupa Pu Tlangdingliana’n Lungleia World Consumer Day va hmanpuia Resource Persona tang tura min beisei thu min hrilh a.He Sawmna hi i hê lovin ka pawm nghal thlap a. Tichuan, zawi zawiin ka inbuatsaih a.
World Consumer Day Lungleia kan hman dawn chuan ka consumer lehkhabu 7-na Consumer-te Zalenna tih chu tlangzarh ve ila, ka ti a. Pu Dinga ka be nghal a; Lunglei DC Pi Ramdinliani ka be nghal bawk a. Pu Dinga remtihna ka lak a ngai a. Pi Ramdini pawmpuina ka lâk tel a tul bawkin ka hria a. Mi pawimawh tak mai an ni a. Consumer chanvo humhalh tura ka vir velnaah hian an tangkai em em a, an tangkai zel turah ka ngai bawk a ni. Anni bakah hian Lunglei District Consumer Association hruaitute ka be nghal bawk a ni. An hruaitu Pu Hmingate, Pu Châmate pawhin min phurpui hle a, ka lawmin ka hlim em em a ni.
Tichuan, Consumer-te Zalenna bu eng emaw zat nen chuan Lunglei khawpui chu March ni 14 zing dar 7 leh a chanve velah Pu Dinga ATI leh Staff fel tak Awtea te nen chuan kan pan ta a. A huphurhawm, a nuamin a phurawm si!
Kan chhuah phat atangin Pu Dinga leh Awtea te hian min duat thiam hle a. Ka hrehawm an hlauva, nuam lo ka tih an duh lo. Kalkawng tluanin Consumer Issue ka sawipui a. Pu Dinga pawhin min ngaithla tha khawp mai. Consumer Day-a ka sawi tur tam tak ka sawi nghe nghe ni ta khan ka hria a. Ngaihnawm taka sawi ka thiam hran lo nâin ani,Hotupa hi mi fing ngang a ni a, min ngaithla ve hle chuan ka hria. Consumer Awareness Discussion kal kawngah kan nei a ni ber e. Pu Dinga pawh hian Darlunga Consumer Awareness an neih thute chu a sawi tui hle a. Darlung ho hi an vannei hle a ni. Tichuan le,Lunglei khawpui chu chawhnu dar 2 velah kan lut a.
Seasions Hotel-ah kan thleng : Seasions Hotel Room No. 306-naah min dah a. Anni erawh double room- 308-ah an awm thung a. Min dah VIP hle a, phu erawh ka inti lem lo. He Hotel hi a nuamin a changkang khawp mai. Thawktute pawh an felin an hawihhawm narawh e. Kan nawm loh an hlau hle a, kan hlim loh an phal lo ni berin ka hria. “A hrehawm em”?A nuam em”,?tih hi a thunawn a nia, nizanah i mu tui em? ” tihte chu zawhna chhan nuam tak a ni. He Hotel hi Lunglei khawpui hmun lailai tak, Bazar Venga awm a ni a, chhuah vah a awlsam a, pan a man hla hle a ni. A khaw thlir pawh a rem hle a ni.
Tichuan, beisei phak loh Deputy Commissioner Bungalow-ah chuan Dinner tui hnai tak mai Lunglei DC Pi Ramdinliani’n min buatsaihsak a.
Pi Ramdini hi Lungleia DC a nih hma hian ATI-ah te, DP & AR-ah te FCS & CA ah te hotu ber niin a lo awm tawh a ni. Pu Dinga nen an innel a, an inkawm ngeih a, an inthlahlel a. Kei ve pawh hian Consumer Affairs a enkawl laite, ATI-a awm laite khan Consumer-te tan ka lo tulpui ve tawh thin a. Ka nau MRB-a thawk thin Sawmi te nen an lo inkawm nasa thin bawk. Ka nau neih a, ka nel a, a lakah hian ka pangchang thin hle. Min duhsak a, min pui nasa thin hle bawk. Heng te avang ni em em chuang hian, min duhsak em avangin chaw eiah min duh a ni ber. Kan puar a, kan tlai hle! Kan va lawm em! Pi Ramdini pasal lah hi a fel em em leh nghal a! Hetiang mi hi kei chuan ‘pasaltha’ ka ti!
DC Bungalow hi a nuamin a zahawm a, hlut reng tur a ni. DC chenna thlang lawkah zawl nuam tak a awm a, a thlang lawkah tlang bawk, bukte a intih theng thawtna hmun a awm leh nghal a. DC hian helai hmun hi min fanpui a, nuam tak a ni ringawt. Han sawi vak ngaihna pawh ka hre lo, kei lung mawl hian.
He Lunglei DC Pi Ramdini hi mipui chanvo ngai pawimawh a, vei em em tu a ni a. Lunglei District Consumer-te pawh hian a hna thawh rah hi an la hmuh ngei ka beisei tlat a ni. Vairam-pur lama Consumer Activist-te hnena Pi Ramdini ka comment dan chu “Pi Ramdini is a very staunch campaigner believing in consumer real thought” tiin. Kan Mizo hmeichhe zingah hian he Mizo nu ang hi awm nual se, ka duh hle.
Programme kan tan: Chaw hma dar 11 pelh hreta programme kan tan a. Mipui hma chhawn zawngin ka thu ve a. Consumer hotuten kan Khual lian bulah min thuttir a. Ka han hawi vela kei chiahin nghawngawrh ka awrh a, Chhawr dawhah hian Addl.DC Pu James Miahlung hovin kan thu a.Pu James-a hi Lunglei DSCO, Pi Hlimpuii chu ka chhak lawkah a thu bawk a. Ani hi Pi Hlimpuii hi kan u Lallianzuala Sailo(zaithiam Pi Lalsangzuali Sailo nau) fapa nupui a ni a; kan mo nu a nih ve mai chu’h! Pi Hlimpuii hian ka lehkhabu hi copy eng emaw zat min leisak nghe nghe a ni. Lungleia ka kal hmasak ber hunah ka tlawh chhuak thei ang chu maw!
Chawhma lam hun hi chu kalsan mai ila… Chawhnuah ka hun a lo in her chhuak ve ta a… Pu Dinga AD, ATI chuan he Hun hi hneh takin a kaihruai a. Keiin thu ka sawi ta a… Consumer Protection Act 2019 tlangpui ka sawi a. Hei bakah hian kum 25 chhung zet consumer right ka lo vahvaihpui ve na a, ka tawnhriat ka sawi ta ber a. Mipui lam ka han thlirin mi thlu hmel ka hmu lova. An ngaithla tha thawkhatin ka hmu tel bawk. Ka theihna leh finna tlemte hmanga complaint ka lo buaipui thin dante chu ka au chhuahpui a, consumer chanchin tha ka uar hle a, consumer tuarna chu consumer engthawlna a la nih tur thu ka uar hle. Mipui hnenah ka phone number ka tlangzarh a, an copy sup sup a. Ka mobile phone number chu Mizo tawngin ka sawi a, sap tawng aiin copy an harsat zawk a. Sap tawngin ka phone number chu ka sawi ta zawk a ni.
He kan hun hmanaah hian retailer ho zing atangin eng emaw zat an lo kal a, PWD, PHE lam Officer-te an lo lang bawk a. An fakawm ka ti hle. Er Manuni, P&E, EE pawh, helai E-in-C- (P&E) a ka lo hmel hriat ve pawh a lo tel ve nawlh mai a. A thlamuan thlak em em a ni. A nuam ve hrim hrim e, sawi ngaihna pawh ka hre lo!
Zawhna leh chhanna hun kan hmang:
Thute kan sawi zawh hnu chuan zawhna leh chhanna hun kan hmang a.
Kan Hotu nu Pi Ramdini chu a lo thleng a,hah pawh sawi lovin ka lehkhabu chu a han tlangzarh nghal a,ka va lawm em! Thuvtha tak tak a sawi,min sawiva,min sa nghal bawk!He Nu ropui leh tha kher kher hi chu!
He hunah hian PHE lamte Buhfai Retailer buhfai sem leh kawnga hrang hranga Consumerte harsatna chungchangah zawhna leh chhanna neih a ni a.Keiin he huna ka thupui sawi leh zawhna chhanna kan neih chungchangah kan Chairmanin khai khawmna min neihtir a. Pu Châma,Secy,LDCA -in lawmthu sawina a neih zawh hnuin Chairmanin Meeting chu a khar ta a ni. a,Tichuan,he Hun duhawm tak hi kham lo takin Chawhnu dar 3:30 velah kan til tiak ta a ni. Programme kan hman zawhah hian Hall chhung leh pawnah mi chi hrang hrangin thla min lakpui a, Retailer ho nen pawh thla kan la!A vanneih thlak a,a hlimawm bawk.
Ka lehkhabu tlangzarh consumer-te Zalenna pawh kan tiral thei. Ka lawm hle a ni. A sei lutuk dawn…
Ni 16 zing dar 7 velah Seasons Hotel kan bye bye e. Zawlkhawpui pana kan inkhalh chhuah mek laiin Darlung khua a, mi pakhatin Pu Dinga a lo pun a…Football net chhia an lei ,an thleng leh theih loh avanga harsatna an tawh thuah a ni a.Chu ve leh huaisennaa thuama awmin dikna tan chhanin Pu Dinga hian sports dawr hi a va phone nghal rap mai a. Net chu an lo thlengtir leh ta a ni. Consumer te kan hlim e…Tichuan, Aizawl hi 1 pm velah kan thlengin Charity Lodge ka lut a,complaint ka dawng nghal pang! … ka nupui fanaute pawh an lo tha e.He chanchin tha thu,Consumer-te dikna hi kan tlangaupui angba,kan hril zel dawn a ni
- See you next week! Centre for Consumer Education pan rawh.