Inrinni zan khan ram hrang hrangten international friendly match an khel a, football ram ropui England chu an mikhual Brazil lakah an tlawm. Inkhel dangah France an mualah an tlawm a ve bawk.
- England 0-1 Brazil
Football ram ropui pahnih; England leh Brazil te chu khelmual ropui Wembley Stadium-ah an inhmachhawn a. Inkhel hmuhnawm takah hun tawp dawn hnaih minute 80-naa rawl thar Endrick goal thun hmangin Brazil in hnehna an chang.
Wembley-ah England leh Brazil ten inkhel hmuhnawm an lantir a, goal pawh a lut har hle. England manager Gareth Southgate chuan Newcastle United forward Anthony Gordon bul a tantir a, England senior team tan bul a tan hmasak berah Gordon hian goal a thun nghal teuh hle. Gordon bakah hian United midfielder kum 18 mi Kobbie Mainoo pawh a vawi khat nan England tan a inlan ve bawk. Rawlthar zinga langsar ta ber chu Brazil chakna goal thuntu Endrick a ni.
Team hnih ten an hun tha an hlah ve ve hnuin rawlthar kum 17 mi Endrick chuan minute 80-naah awlsam takin a pet goal a, Brazil chakna goal a thun. Endrick goal thun an sut theih loh vangin England chu kum 2020 hnu lamah a vawi khat nan Wembley-ah ngei an tlawm ta a ni.
England laka Brazil chakpuitu Endrick hian hmabak eng tak a nei mek a, kum 18 a tlin hunah khawvela football club ropui ber Real Madrid a zawm dawn.
- Germany tana goal thun rang ber Wirtz
England leh Brazil an inhmachhawn rual hian football ram ropui pahnih; France leh Germany te an inhmachhawn ve bawk a. Lyon khawpuia inkhel hmuhnawm takah Germany chuan si hnih faiin mualneitu France an hneh. France laka goal hmahruai thuntu Florian Wirtz chuan Germany tana goal thun rang ber record thar a siam.
An lenluhna mualah Jullian Nagelsmann a team Germany in bul an tan tha viau a, second sarih chhung lekin goal an thun nghal der. Bul an tan fel chauh tiih ram tan khel tura kir leh Toni Kroos chuan Florian Wirtz tan tha zetin ball a siam a. Wirtz hian second sarihna lekah nalh fein a pet goal a, hmahruaina goal a thun nghal. Second sarihna leka goal a thun hi Germany player awm tawh zawng zawng zingah ram tana goal thun ran ber record a ni a. Team lian France lakah hnuhma ropui a hnutchhiah thar.
France hian an si phurh sut tum viau mah se hun an sut thei lova, goal an chhuah belh. Minute 49-naah Kai Havertz chuan Germany goal hnihna a thun a. Khelh thum chhung chak thei lo zawn tawh Germany chuan France lakah hnehna an chang a, chak ni hmel an hmu ve le ta nge nge. Germany hi Euro 2024 thlengtu tur an ni a, an mualah ngei champion tumin tan an khawh zui ang.