Thawhtan zing khan NBA regular season khelh chhunzawm a ni a, inkhel hmuhnawm takah Los Angeles Lakers chuan an khingpui Indiana pacers an hneh. Inkhel dangah Milwaukee Bucks in Oklahoma City Thunder an hneh ve bawk.
LA Lakers leh Indiana Pacers te hian inkel hmuhnawm tak an lantir a, point tawh an thawkchhuak tam dun hle. Point 150-145-a Lakers an chak tum hian Pacers in bul an tan tha a, quarter khatnaah point rukin an chungnung. Quarter hnihnaah Lakers insiamtha a, point 10 zetin an chungnung a. Point li a hmahruai chungin chawlhlawk an hmang.
Chawlhlawk hnu lamah LA Lakers an khel tha chhunzawm a, quarter thumnaah point 13 zetin an chungnung leh a, quarter hnuhnung ber an hmachhawn dawn meuh chuan point 17 zetin hma an hruai a, chak turin an dinhmun a tha tawh hle. Point 17 zetin hnufual tawh mah se Pacers an hnual mai lova, quarter hnuhnung berah an khel tha zui hle. Quarter hnuhnung berah Pacers hian point 46 ngawt an thawkchhuak a. Point 12 ngawtin chungnung mah se, point ngain an khingpuite an umphak lova, Lakers lakah uiawm takin an tlawm ta tho a ni.
Pacers laka hnehna an chan tum hian LA Lakers tan Anthony Davis chuan point 36 a thawkchhuak a, ball sawh let vawi 16 a dawng tling bawk. Pacers lakah LeBron James pawh a chetha thawkhat a, point 26 a thawhchhuah bakah assist vawi 10 a nei tling bawk. Indiana Pacers lakah point 150 zet an thawhchhuah hi LA Lakers in kum 37 chhunga NBA-ah point an thawhchhuah tam ber tum a ni bawk.
Thawhtan zinga inkhel dangah Milwaukee Bucks chuan an khingpui Oklahoma City Thunder chu point 118-93 in an hneh. Bucks hian Eastern Conference-ah pahnihna an luah chhunzawm a, Oklahoma City Thunder hian Western Conference-ah pahnihna an luah chhunzawm ve bawk. Thawhtan zinga inkhel dangah Golden State Warriors, Los Angeles Clippers leh Miami Heat ten hnehna an chang ve bawk.