International break a ni a, kar tawp kha ram leh ram inkhelh hun a ni a. International friendly match khelh a ni a. Concacaf Nations League khelh a ni bawk. Kar tawp football hnuhma langsar kan thlir kual leh ang.
- International Friendlies
Inrinni zan khan England leh Brazil te Wembley Stadium-ah an inkhel a, Endrick goal thun hmangin Brazil an chak. Brazil chakna goal thuntu Endrick kha kum 17 leh ni 246-a upa a ni a, Wembley Stadium bikah senior team tana goal thun thei naupang ber a ni. Endrick hi Brazil tana goal thun zinga naupang zual palina a ni bawk a, a chunga awmte chu; Pele (Kum 16 leh ni 256), Edu (Kum 16 leh ni 306) leh Ronaldo (kum 17 leh ni 228) a naupang te an ni.
Inrinni zan khan Austria chuan si hnih faiin Slovakia an hneh. Slovakia an hneh tum hian Christoph Baumgartner chuan Austria tan inkhel tan atanga second 6 chhung lekin hmahruaina goal a thun. Hei hi men’s inernational football-a goal thun rang ber nia hriat a ni a. Official in puan chian a la ni chiah lo thung. Mipa football-ah hrim hrim chuan second 2.56 chhung leka goal thun Marc Burrows chu goal thun rang ber record ding lai a ni thung.
Ram tan inkhelh a chawlhsan hnuin Germany tan Toni Kroos a inlan leh ta a, Kroos hi ram tan inkhelh a chawlhsan atanga ni 999 hnu chiahah ram tan a inlan leh a. German tana goal thun rang Florian Wirtz goal thun kha a siamsak a ni nghe nghe.
Germany lakah second sarih chhung leka goal an chhuah kha France in mikhat chhunga goal an chhuah vawi thumna a ni a, Netherlands leh England an hmachhawn tumin inkhel tan atanga minute khat chhung lekin goal an lo chhuah tawh bawk.
Zirtawp zan khan Colombia chuan London Stadium-a an khingpui Spain chu minute 61-naa Daniel Muñoz goal thun hmangin an hneh nawlh a, hei hi Spain laka an chak vawi khatna a ni nghe nghe. Colombia hian Europe ramte an ngam ang reng viau a, Europe ram an hmachhawn hnuhnung vawi 12-ah an tlawm lo zawn tawh a. Europe ram lakah vawi 20 zet tlawm an nei lo tawh bawk. Spain hi Europe ram zingah an hneh loh hnuhnung ber leh an hneh thar lam ber an ni.