Punjab National Bank-a sum tam tak tihchingpen chungchanga India-in man a duh, Nirav Modi chu London-a man a nih hnuah India-a hruai haw tumin CBI-ED team chuan London pan an tum mek.
Central Bureau of Investigation (CBI) leh Enforcement Directorate (ED)-a Joint Director-level officer ve ve hona hnuaiah London pan tum hian nimin khan lehkha pawimawh hrang hrang an buaipui a. ED officer-te hian Modi-a nupui, Ami an puhna thar ber leh thil buai hrang hranga Moodi inrawlhna ken an tum.
London-a an châm chhungin Indian official-te hian officer hrang hrang an hmu dawn a, heng zingah hian Crown Prosecution Service (CPS)-a thawkte pawh an tel a. Modi leh a chhungte an puhna hrang hrang leh an inrawlh ngei a ni tih an finfiahnate an sawipui dawn a ni.
Kum 48-a upa, lunghlua sumdawng lian, Modi hian $ tld 2 zet Punjab National Bank atang hian a patea, Mehul Choksi nen an tichingpen tih finfiahna India hian a nei a, an tlan bo ta daih a ni.
London khawpuiah a cheng zui a, India-in a ngen angin Interpol-in a lakah Red Corner notice a chhuah a, tun hnai lawk khan man a ni ta a ni.
Kar hmasa khan Westminster Magistrates’ Court-ah lantir a ni tawh a, bail a dilna hnawlsakin naktukah a inlan leh dawn a ni.