India chuan phal loh thil tawlhruk leh thiltih awm thin tihtawp nan Myanmar nena an inrina, km 1,610-a thui chu kum 10 vel chhunga hung hna thawhna atan $ tluklehdingawn 3.7 dawn a ruahman niin hemi lam hre chiangten an sawi.
Sorkar laipui hian kumin kum tir lamah khan ramri hung tum a nih thu leh kum tam tak lo hman tawh, ram pahnih inrina hnaiha chengte awlsam taka an inkalpawh theihna, visa-free movement policy chu ram himna atan leh hmarchhaka a ram chin humna atan hung a ni dawn tih a lo puang tawh.
Sorkar hnuaia committee-in hungna tura ruahman sum hi a pawm tawh a, Prime Minister Narendra Modi-a cabinet-in an pawm leh a ngai bawk niin a hretu pakhat, chanchinbu mite hmaa a nihna sawi duh loh pakhat chuan a sawi a ni.
Prime minister pisa bakah home, finance, foreign affairs leh information & broadcasting ministry-te pawhin hemi chungchanga zawhna hi an chhang duh rih lo thung.
Myanmar chuan a thenawm ramin an inrina hung a tum chungchangah hian engmah sawi a la nei lo bawk.
Kum 2021-a sipaiten Myanmar-a thuneihna an chan thar leh hnuah khan civil mi leh sipai tam tak chu India-a state hrang hrangah an tlan lut tawh a. Ram pahniha chengte hi thlahtute atanga inunau an ni hlawm.
He inkalpawhna hi New Delhi chuan a ngaimawh a, nakina chi leh chi inkara buaina thlen thei a nih a hlau a ni.
Mi thenkhat chuan Manipur-a chi leh chi inkara buaina chhuak pawh Myanmar ramria inkalpawh a awlsam lutuk chuan a tizualkai niin an sawi bawk.
Kum khat dawn chu Manipur-ah hian chi leh chi inkara tharum thawhna a thleng tawh a, hnam pakhat zawk hi Myanmar-a Chin hnam nena inunau an ni.
Ramri hung chungchang ngaihtuahtu committee-a tel Indian thuneitu sang pakhat chuan hungna hrulah hian kawngpui sial vek pawh rawt tel a nih thu a sawi a. Km 1,700 zeta thui kawng siam turte hian sipai inkulhna leh ramri pawh vek tura ruahman a nih thu a sawi bawk.
India leh Myanmar ramri hung tumnaa ruahmanna ang chuan km khat chin zel hung nan Rs. maktaduai 125 dawn sen a ngai dawn tihna a ni a. Kum 2020-a Bangladesh nena inrinna hungna kha km khatah Rs. maktaduai 55 vel niin a let aia tam a ni dawn tihna a ni a. A man a tam em em bik chhan tur hi tlangram hmun chhengchhia a ni a, a hautak zawk bakah tun lai hmanraw tha ber ber nena thuam nghal a nih dawn vang nia sawi a ni.