Thawhleh zana ram leh ram inkhelhah Germany chuan khingpui hautak Netherlands an hneh a, team lian lakah hnehna an chang zawn. Thawhleh zana inkhel dangah England leh Brazil in an khingpuite an draw.
Euro 2024 thlengtu tur Germany hian Deutsche Bank Park-ah football ram ropui pakhat Netherlands an mikhual a, inkhel hmuhnawm takah si an phurh hmasak zet hnuin hnehna an chang let. Germany hian France an hneh hnu lawkah Netherlands an hneh zui leh a, Euro 2024-ah champion turin inrintawkna sang zawk an nei thar.
Netherlands hian an lenluhna mualah bul an tan tha viau a, inkhel tan atanga minute lina lekah Joey Veerman chuan hmahruaina goal a thun nghal. Hma taka goal an thun vangin phur viau mah se an phur rei lova, goal an chhuah ve ta thuai. An mualah hnehna chan ngei tuma inlan Germany tan hian Maximilian Mittelstädt chuan minute 11-naah goal thunin an si phurh a sut. Minute 11 chhung lekin goal hnih lut nghal mah se goal dang erawh a luh belh har viau a, 1-1 a inhnehtawk chungin chawlhlawk an hmang.
Chawlhlawk hnu lamah pawh goal a luh belh har leh viau a, goal thun belh thei an awm lawk lo. Hun tawp dawn hnaihah mualneitu an che fuh a, Niclas Füllkrug chuan minute 85-naah Toni Kroos siamsak atangin hma an hruai letna goal a thun. Fullkrug goal thun hmangin Germany hian team lian lakah hnehna an chang zui ta a ni.
Julian Nagelsmann hnuaiah chet that loh chang nei bawk thin mah se Germany an insiamtha a, an khelh hnuhnung pahnihah hnehna an chang zawn. An hneh hnuhnung pahnih; France leh Netherlands te hi Euro 2024-ah pawh champion tura rinkai pahnih an ni hial a. Result tha tak an neih vangin Germany hian an mualah ngei champion thei beiseina an nei sang leh zual a. Mipui thlawpna tha tak nena inlan tur an nih bawk vangin champion turin rin an kai sawt hle bawk.
- England an chak zo lo
Brazil lakah an tlawm hnuin England chuan Belgium an hmachhawn zui leh a, Wembley-ah an tlawm nawn teuh hle. Belgium laka si an phurh reng hnuin hun tawp dawn tepa Jude Bellingham goal thun hmangin England hian tlawm an pumpelh.
Khelmual ropui Wembley Stadium-a lenglut Belgium in bul an tan tha viau a, chawlhlawk hmain goal hnih an thun hman. Inkhel tan atanga minute 11-na lekah Youri Tielemans chuan hmahruaina goal a thun. Goal an chhuah hnuin Three Lions an insiamtha nghal a, goal pawh an thun har lo. Minute 17-naah England hian penalty an hmu. He penalty hi Brentford striker Ivan Toney chuan a pet goal a, ram tan a vawi khat nan goal a thun.
Goal khat ve ve an thun hnuin Belgium in goal an thun hmasa leh a, chawlhlawk dawn hnaih minute 36-naah goal hmahruai thuntu Youri Tielemans chuan hma an hruai nawn lehna goal a thun. Youri Tielemans goal hnihna hi Belgium in an chakpui teuh viau a, hun pek belhah goal an chhuah vangin uiawm takin an chak zo lo. An mualah tlawm tura ngaih ni hman hial England tan hian minute 90+5-ah Jude Bellingham chuan goal pawimawh tak thunin an si phurh a sut. Bellingham goal thun hnuin goal dang a luh belh thei tawh lova, England leh Belgium te chu 2-2 in an inhnehtawk zui ta a ni.
Euro 2024 khel tura an inbuatsaihnaah England an chetha lo. An mualah ngei Brazil hneh lova an tlawm hnuin Belgium lakah tlawm an pumpelh hram a ni a. Champion an tumna kawngah insiamthat thuai an mamawh.
- Spain 3-3 Brazil
Footbal ram ropui pahnih; Spain leh Brazil te chu khelmual ropui Santiago Bernabeu-ah an inhmachhawn a, 3-3 in an inhnehtawk.
Spain hian an mikhual lakah bul an tan tha viau a, minute 12-na lekah Rodri chuan hmahruaina goal a thun. Rodri goal thun hnu hian Dani Olmo chuan minute 36-naah an goal hnihna a thun a, si hnih faiin hma an hruai. Goal hnih an chhuah zawn hnuin Brazil an insiamtha a, chawlhlawk hmain goal khat an thun hman. Minute 40-naah Rodrygo chuan Brazil si phurh a sut then a, Spain in 2-1 a hmahruai chungin chawlhlawk an hmang.
Chawlhlawk hnu lamah Brazil an khel tha chhunzawm a, England laka chakna goal thuntu Endrick chuan minute 50-naah goal thunin an si phurh a sut. Endrick hian Brazil tan goal a thun zawn a, football khawvelah a hming a chher lian deuh deuh zel.
2-2 a nih hnuin inkhel a hmuhnawm a, goal pawh a luh belh lawk thei lo. Hun tawp dawn hnaih minute 87-naah Spain an vannei a, penalty an hmu. He penalty hi Rodri chuan a pet goal a, Spain in hma an hruai nawn leh. Spain lakah Brazil an tlawm hman teuh hle a, hun tawp dawn hnaihah chhanhimin an awm hram. Hun tawp dawn tepah Brazil hian penalty an hmu. He penalty hi Lucas Paquetá chuan a pet goal a, an si phurh a sut zo. Lucas Paquetá goal thun vangin inkhel hmuhnawm tak chu 3-3 in a tawp zui ta a ni.