Ningani khan Congress party chuan MP Inthlan atana Campaign Kickoff Programe, Vanapa Hall ah an hmang a. He hunah hian Lal Thanzara, President, MPCC chuan thu sawiin, “Tun tum MP inthlan tur hi keini Mizo Kristiante tana hun pawimawh ber a ni” a ti.
Hnam tlem zawk leh sakhaw tlem zawk betute BJP sawrkar hnuaiah hian kan him loh em avangin Mizo mipuite’n kan ngaihpawimawh a ngai a ni. Congress party hruaitu hmasa ten hnam tin ten zalen taka kan sakhua kan biak theih nan India danpui hnuaiah sakhaw zalenna min siamsak a. Chu chu BJP sawrkar hian nuaibo an tum mek a ni. Manipur ah te chuan Good Friday leh Easter Sunday ah te pawh sawrkar hnathawk te office kai turin an ti a. Mizoram Synod pawh vaibelchhe 25 Income Tax hovin an thing mek niin kan hria a, heng te hi tunhma a awm ngai lo a ni.
Heng thil dik lo, khaweng pawh zah lova chetna hi tunhma in a la awm ngai lo a. Kejriwal an man chungchagnah te pawh USA leh Germany te pawh an tawngchhuak hial a ni. Hetih lai hian kan rama rorel lai mek ZPM leh MNF Party te chuan NDA a tel an inchuh ta emaw tihtur a thu thang te hi thil zahthlak tak a ni. Kan ram, kan hnam, kan sakhua a him loh chuan hmasawnna eng ang pawh nei mah ila a him lo anih tih kan hriat a ngai a ni, a ti bawk.
Congress party hian Mizoramah hmasawnna tam tak an lo thawk tawh thin a, Hydel Project te kan siam a, Hall leh Infiamna hmun te kan siam a, Medical college te kan din a, Airport te kan siam a, NLUP hmangin chhungkaw tamtak kan khaichhuak chung pawha mi thenkhat in kum 30 chhung engmah ti lo, hmasawnna hna thawk lo a min sawi thin hi thu dik lo a ni tih kan hriat a ngai a ni, a ti.
Congress Party MP Candidate Lalbiakzama pawhin thu sawi in, RSS leh an party din BJP ter hian Hindu lalram din hi an tum ber ani a, Hindu ni lo te hi second class citizen ang chauhin min chhuah mek a ni. Forest Conservation Act te hi kan tan a hlauhawm lutuk a ni. India Parliament hian Article 371(G) angin kan ram hi min chhuhsak theih loh laiin, BJP sawrkar chuan min chhuhsak an tum mek a ni. Electoral Bonds te an hmangsual a, Income Tax department leh Enforcement Directorate te hmangin Company te sum party tan an chhuh a. Press mite zalenna an rapbet a, Court te hial pawh an thunun vek tawh a ni, a ti a.
MP ka ni ve anih chuan Environment khawih lo thei ang berin hmasawnna hna thawh anih theih nan leh kan intodelh theih nan hma ka la ang a. Vanduaithlak takin central lamah BJP an sawrkar hlauh anih pawn kan ram tana tha lo tur an dan siam leh hmalakna te hi India Constitution tanchhan in nasa takin ka beilet ang. Hnam tenau dang leh sakhw tlem zawk te thurualpui in khawvel hriatah ka puangchhuak ang. Mizoram leh India ramah hian thlam uang taka kan awm zel theih nan in vote hlu tak thlak ang che u, a ti bawk.
He hun hi Lalnunmawia Chuaungo chuan a kaihruai a, Lalrinmawia Ex Minister, Secretary, Search Committee leh C. Dothansanga, Secretary, MPCC Campaign Committee ten Report an pe a, Dr Lalmalsawma Nghaka chuan lawmthusawina a nei bawk a ni.
Kalkhawmte hian hetiangin Resolution an pass bawk:
- India ram Democracy bulṭhut, Indian Constitution in mipui te zalenna min pek (Right to Freedom) min paih bo sak mektu leh Pathian ram zauhna tura mission field-a kan rawngbawlna kawnga nasa taka harsatna min siam saktu, Central-a BJP leh a ṭanrualpui party te NDA sawrkar hi paihthlak an nih theih nan Congress Party chuan theihtawp kan chhuah dawn a. Keini Mizote, hnam tlem leh hnufualte chimral hlauhawma min dahtu BJP hi engti kawng mahin kan thawhpui dawn lova, kan dodal zel dawn a ni.
- Kan ram, kan hnam leh kan sakhaw zalenna humhim nana sulsu thei tur MP candidate ṭha tak Pu Lalbiakzama MPS Rtd kan nei hi kan lawm a. Ani hi kan ram leh mipuite aiawh tura thlan tlin a nih ngei theih nan MPCC chuan Mizoram mipuite khawngaihna leh vote hlu tak kan dil a ni.