Straight sets hmanga Grigor Dimitrov hnehin Jannik Sinner chuan Miami Open men’s title a chang a, Masters 1,000 title a lak vawihnihna chiah a ni.
Pathianni zan final match-ah Australian Open champion Sinner hian Bulgarian lakah hnehna nuamsa 6-3 6-1 changin, kum 2021 leh 2023 final-a a tlawm tawhna mangchhia a thawhsan thei ta a ni.
Italian Sinner hian kum bul a tan fuh takzet a, tun kha kum 2024-a title pathum a sualchhuahna ni der tawhin, Melbourne leh Rotterdam lamah a lo champion tawh bawk a ni.
Tun season-ah Sinner hian match khat chiah a la hloh a, nimina world ranking thar tihchhuahah a career-a a tawnsanber hun a thleng.
Hnehna a chan zawha Sky Sports-in an kawmnaah Sinner chuan a tan chawlhkar dangdai leh hlu bik a nih thu sawi chungin court chhunga boruak hrang hrang leh mi inang lo pui pui a hmachhawn thu a sawi a; final match zet chuan tha a heh thu leh ranking thara world number two a luah chho ve ta chu hlimawm a tih thu a sawi.
Rafael Nadal hnu lama Spain chhuanvawr rawn ni chho mek Carlos Alcaraz lehpel chiah chiaha No. 2 ranking chang thar Sinner hi kum 1973 daih tawha ATP ranking tihchhuah tan a nih hnua Italian zinga top two luah thei hmasaber a ni.
Nimina ranking thar tarchhuahah hian chak zo ta lo Dimitrov pawh world number nine-ah a chho a, Miami Open-ah top seed Alcaraz leh German fourth seed Alexander Zverev a hneh khan ranking-a a dinhmun siamthain, kum 2018 hnu lama a vawikhatna atan top 10 huang a lut.
Dimitrov chuan champion zo ta lo mah se champion tluk thuaka a inngaih thu a sawichhuak nghe nghe.
Inrinni khan hmeichhe singles final-ah American Danielle Collins chuan 7-5 6-3-a rinkai zawk Kazakhstan fourth seed Elena Rybakina hnehin women’s title a hlawhchhuak ve bawk.