Mizoram Football Association leh All India Football Federation tangkawpin a buatsaih, Asian Football Confederation ‘C’ Diploma Coaching Course, March 22, 2024 atanga Regional Sports Training Centre, Saidan Kolasib-a tan chu Thawhtanni khan khar a ni ta.
Course Instructor Nishant Singh (AFC ‘A’) kaihruaina hnuaia ni 11 chhung kalpui C License Course ah hian Mizoram hmun hrang hrang atangin AIFF ‘D’ Licence Coach mi 24 an tel a. Vawiin khan Theory exam neiin result an nghak zui ta a ni.
Course kharna hun hmanpuitu MFA Treasurer Pu Tuikhuahthanga chuan AIFF leh sponsor Mizoram Youth Commission chungah lawmthu a sawi a, Kolasib District Football Association in engkim an lo ruahman thinte lawmawm a tihzia a sawi bawk.
Course Instructor Pu Nishant Singh chuan he course a telte chu Mizoram football leh India football hmasawnna thui tak an kutah a awm tih hre reng turin a chah a. C licence an pass a nih chuan a thui thei ang ber thleng tura B License pawh bei zui ngei se a duh thu a sawi.
Pu Lalrawngbawla, MFA Assistant Secretary chuan kum thum kalta chhung khan vawi 7 zet MFA in license course a buatsaih thu leh tun season tawp hma hian coaching course hnih buatsaih hmabak a la nih cheu thu a sawi bawk.
Tun tum C License course ah hian India international hlui leh I-League club hrang hranga lo khel tawh thin Mizo player thahnem tak an tel a ni.
Tun Course a tel Coach te chuan Instructor in a kaihhruai dan a ngunthluk zia leh khelmual chhung leh pawna football kaihhnawih thiamna tam tak an neih belh avanga hlawkthlak an tihzia an sawi chhuak hlawm a ni.