Mizoram state commission for women chuan tunhnaiah Mizo hmeichhe pakhatin mipat hmeichhiatna lam hawi leh zu te nena an che tla lai social media lama hmuh theiha awm chungchangah suo moto hmangin thubuai an ziak lut.
State commission for women chairpenson C Lalchhandami chuan Mizo hmeichhe thenkhat ten hmeichhe zahawmna tibawrhbang thei turin Social Media kaltlanga an tarlang fo mai chu commission in a ngai thu tak hle a, tunhnaia video viral leh ta chungchangah pawh thubuai an ziah luh tawh thu a sawi.
Chhandami chuan, Social Media kaltlanga mipat hmeichhiatna hawi zawnga mawi lo taka chetna chungchangah hian commission chuan suo moto case hmangin Mizo hmeichhe thenkhatte thubuai a lo siamsak tawh thin tih sawiin, jail ah hial dah luh an lo awm tawh thin, a ti.
MSCW chairperson chuan, Mizo mipuite leh a bikin Mizo hmeichhiate hian social media hman dan chungchangah ram leh khawtlang tana tha leh tha lo thliar thiam a, dan bawhchhe lo zawnga khawsa hram hram tur leh scoiety tana him lo thei reng reng chu ching zui lo turin a ngen tak meuh meuh tih a sawi.
Chhandami chuan hmeichhia te zingah che mawi lo an awm palh changa social media khawih thin leh youtuber thenkhat ten boruak sosang zawnga thil an vawrh darh zel mai chu pawi an tih thu sawiin, hetianga mipat hmeichhiatna rawngkai thlalak vawrh dah te hi dan anga hrem theih a nih thute, mawi lo taka che thinte leh dan bawhchhetute lakah Mizo hmeichhiate zahawmna vawnhim zel nan commission in chak taka hma a lak zel tur thu leh thubuai lian zawk an pumpelh theih nan mi tinte fimkhur zel turin an ngen tih a sawi bawk a ni.