- Dr. C. Lalrampana
A KAMKÊUNA
Mihringte hi thlan tui far zawih zawiha rim taka thawka ei zawng tura siam kan nih rualin tunlai khawvel changkang tawh takah hi chuan thlan tui far lo zawng, ngaihtuahna thluak hmanga thiamna leh finna hmang tangkaiin thlan tui far kher lo pawhin ei kan zawng thei ta. Chutih rualin ei leh in silh leh fen, nitin kan mamawh bakah intihhlimna te. Infiamna leh ennawm en te, tui hleuh, lam leh zai, nulat tlangval inlêm leh nawmna chihrang hrang tih leh temte thlengin kan mamawh thin a ni. Hnathawh leh eizawnna ngawr ngawr bakah mamawh hrang hrang kan nei bawk. Abikin thalaite hian nuam tâwlna tur kawng hrang hrang an mamawh thin. Ramdangte angin kan thalaite hian hringnun chen tur hrang hrangte an nei tha tawk lova, an nun hi a chêp êm êm mek niin a lang. Chung an mamawhte chu engt°e ni le?
RECREATION CENTRE:
Kan thalaite tan hian hunawla intihhlimna hmun (recreation centre) hi mi ramte angin kan nei tha ve lo hle. Sorkar tumah hian hetiang lam hi an ngaihtuah ngai lo nge an dawn tawi hle zawk tih hi ngaihtuah tham a awm Aizawl khawpui chhungah Recreation Centre ang ve deuh 10 vel a awm ve a, mahse, hengte pawh hi private sector vek a ni a, public sector a vang hle. Mi hausa fate tan awltea hman tangkai theih ni mah se, mirethei fate tan erawh hman tangkai ve theih a ni meuh lo. A thlawna hman theih hunawla intihhlimna hmun turte hi sorkar hian thalaite tan siam ve zut se, State Assembly Budget-ahte hian sum ren lovin budget tam tham deuhte dah ve thei se, kan thalaite hian nuam an ti ngawt ang. Mahse, mihausaten sumdawn nana an siam tih loh chu thalaite tan sorkar hmalakna hmuh tur a tlem hle.
ENTERTAINMENT CENTRE
Show, movie, television, emaw, mi tihlim thei performance emaw activity dang emaw, hetiang performance emaw hi kan Aizawl khawpuiah hian intihhlimna hmun cinema hall, movie theater, club leh bar-te a awm meuh lova, mimal hausaten sumdawn nana an siam a nih ngawt loh chuan sorkarin thalaite hmakhaw ngaia hma a lakna hmuh tur a vang hle. Hengte hi mahni in theuhah enin thlir thei tho mah se, kalchhuaha thiante, chhungte leh midangte nen boruak thawl leh thawveng, zangkhai tak hnuaia khawsak leh thlirho tura vah chhuahte an chakin an thlahlel ve ngawih ngawih thin a ni. Nula tlangval tan bik phei chuan mahni biannu bialpate nena hlim taka hun hmanna remchangte a ni lehzel bawk nen, infiamna hmun playground etc. ringawt buaipui bik lovin entertainment centre chihrang hrangte nen a inbuk tawkin hmalak ni se alawmawm ngawt ang.
A TLÃNGKAWMNA
Tarlan tak ang khian thalai rual nun chep takte hian hunawla intihhlimna hmun recreation centre leh entertainment centre kan neih mumal loh avangin Aizawl khawpui dai leh a chheh velah an hunawl hmangin an han chhuak vak (outing) ve bawk thin na a; YMA, JAC, leh Police ten umzuiin an veh reng a, tang motor (prison van) nen inchhawpin a tiral khel theih ang leh rikrap thei ang berin an chângin an ûm darh a, thlaphang hlauhlawp leh khur zawih zawih chungin an tlanchhe chawn chawn thin. Hetiang reng reng hian an hun an hmang thin. Hetih lai karah Social media hrang hranga an chetla hnam hnuk khawiih êm êm lem lo thleng thlengin mi then khat intivei lutuk leh intifekfawn thenkhatte’n FIR nena vaubeh an ching hle thin bawk nen…huihah…Kan thalaite nun hi a chepin a van ralmuang lo tehlul êm! Chuvangin, thalai thangthar duhawm tak takte dikna chanvo heti taka Sorkar leh khawtlangin kan rahbehsaka zalen lo taka kan hual chep mek hi bansanin an hun hlimawm tak hmang ve thei tura zalenna dar vuaksak ve a va hun tawh tehlul êm! Zoram sorkar leh mipuite hi I inngaihtuah chiang teh ang u.