Cricket hmanga inelna lian leh sum tamna ber Indian Premier League (IPL) 2024 khelh mekah Kolkata Knight Riders chuan run 106 zetin an khingpui Delhi Capitals an sawp. Hei hi IPL chanchina insawpna nasa ber dawttu a ni.
Kolkata Knight Riders hian nilai zana an khingpui Delhi Capitals lakah an khel tha viau a, over 20-ah run 272 zet an siam a, mi pasarih chauh an out. Run 272 an siam theih nan Sunil Narine chuan ball 39 atangin run 85 a siam a, a thawhhlawk hle. Rawlthar Angkrish Raghuvanshi chuan run 54 a siam bawk a, IPL-a season khatnaah a khel tha chho hle. Delhi Capitals hian inlehthalna lian thlentir tum viau mah se an hlawhtling zo lova, over 17.2-ah out vekin, run 166 bak an siam thei lo va. Run 106 zetin tlawm zawkah an tang ta a ni.
IPL a point thawhchhuah tam ber hi kar kalta mai khan a thleng a. Sunrisers Hyderabad chuan an khingpui Mumbai Indians lakah mi pathum chauh out chungin point 277-3 an thawkchhuak. Sunrisers Hyderabad hian kum 2013-a Royal Challengers Bangalore record run 263-5 an khum. Nilai zana Delhi Capitals sawptu Kolkata Knight Riders hian Royal Challengers Bangalore record lo siam tawh an khum ve leh a, record thar erawh run ngain an phak ta lo thung.