Nilai zan khan English Premier League 2023-24 khelh chhunzawm a ni a, Luton Town hnehtu Arsenal chu Table chung berah an kir. Arsenal an chak rual hian Manchester City pawhin awlsam takin hnehna an chang ve bawk. City tan hian Phil Foden chuan hattrick a siam.
- Arsenal 2-0 Luton
Liverpool lehpela hmahruaitu ni zui leh tura chak mamawh Arsenal chuan Emirates Stadium-ah tlahniam thei dinhmuna ding mek Luton Town an mikhual a si hnih faiin hnehna an chang. An muala point thum an hmuh hmangin Gunners hian Liverpool an lehpel lailawk a, table chung berah an kir a, champion tumin hma lam an pan zel.
Pathianni zanah Manchester City laka chak zo lo Arsenal hian an mualah hnehna chan ngei tumin tan an khawh a, 18-naa awm mek Luton an ngam hle. An mualah ball chang tam viau mah se beisei angin goal erawh an thun mai thei lo thung. Beisei aia goal a luh tlai hnuin captain Martin Gunners chuan minute 24-naah Kai Haverz siamsak atangin hmahruaina goal a thun. Goal an thun vangin Mikel Arteta team in inrintawkna sang zawk an nei a, chak turin an game a nghet zui viau bawk.
Ødegaard goal thun hnuin Gunners an khel tha chhunzawm a, goal thun belh tumin an mikhualte an nawr zui char char. An kut zalah ngei goal thun belh mai thei lo mah se chawlhlawk hmain goal dang an neih belh leh hman. Chawlhlawk dawn hnaih minute 44-naah Luton Town player Japan defender Daiki Hashioka chuan an lamah a ti-goal a, Arsenal goal hnihna a thunsak.
Chawlhlawk hnu lamah inkhel a hmuhnawm zui viau naa goal dang a luh belh thei lo. Arsenal hian chawlhlawk hmaa an goal hnih thun an chakpui a, an mualah point thum an hmu zui ta a ni. Luton Town laka an point thum hmuh hmangin Gunners hian khelh 30 atangin point 68 an hmu a, point khatin Liverpool an lehpel. Liverpool hian ningani zan khan Sheffield United an khel a, an chak a nih chuan Arsenal lehpelin hma an hruai nawn leh thung ang.
- City tan Foden a vul
Nilai zana inkhel dangah an trophy kawl mek humhim tuma tan khawh, an chunga awm mek Liverpool leh Arsenal te hnaih zel tura chak mamawh em em bawk Manchester City chuan palinaa awm mek Aston Villa an mikhual a, 4-1 in hnehna an chang. City tan hian Phil Foden a khel tha viau a, hattrick a siam. City tan hattrick a siam leh tak vangin Foden hi Ballon d’Or dawng tura rinkai zingah sawi tel a ni
Pathianni zana an mikhual Arsenal laka chak zo lo City hian Etihad Stadium-ah chak ngei tumin tan an khawh a, goal pawh an thun thuai. Club leh ram tan midfielder tha a nih lan chiantir nawn leh turin Rodri chuan minute 11-na lekah Jeremy Doku siamsak atangin hmahruaina goal a thun. City hmahruaina goal thuntu Rodri hi langsar vut lo mah se a pawimawhzia a lang nawn leh thin. EPL-ah City an champion a nih chuan mimal chawimawina sang a dawn ngei a rinawm.
Hma taka goal an chhuah vangin palina nih tuma tan khawh mek Aston Villa an buai lova, an si phurh an sut ve thuai. Jhon Durán chuan minute 20-naah goal thunin an si phurh a sut. He goal vang hian champion lai City lakah point hmuh theih beiseina sang tak an nei thar a. Mah se he goal hi City leh Phil Foden chhaihkawlhtu a ni ta daih zawk.
City leh Villa in goal khat ve ve an thun hnu hi chuan Phil Foden show a ni deuh chawt tawh. England midfielder Foden hian chawlhlawk dawn hnaih minute 45+ 1-ah hma an hruai nawn lehna goal a thun a. A goal thun hmang hian 2-1 a hmahruai chungin chawlhlawk an hmang.
Chawlhlawk hnu lamah City an khel tha chhunzawm viau. Minute 62-naah Foden chuan an goal hnihna a thun a. Minute sarih hnu lekah Foden hian goal a thun zui leh a, hattrick siamin, hnuhma lian a hnutchhiah belh.