Zirtawpni zing khan NBA 2024 regular season khelh chhunzawm a ni a, inkhelh hmuhnawm takah LA Clippers chuan champion lai Denver Nuggets an hneh. Inkhel dangah Golden State Warriors in hnehna an chang ve bawk.
LA Clippers leh Denver Nuggets te hi an inhnehtak viau a, an inlehthal tawn zak zak. Nuggets hi bul tan tha zawkah an tang a, quarter hmasa berah point 11 in chungnung zawkah an tang. Bul tan tha lo mah se Clippers an insiamtha thuai a, quarter hnihnaah point 15 zetin chungnung zawkah an tang a, point li a hmahruai chungin chawlhlawk an hmang.
Chawlhlawk hnu lamah pawh an inhnehtawk zui zel a, an inlehthal tawn leh zak zak. Quarter thumnaah point khatin Clippers an chungnung leh a, quarter hnuhnung berah point thumin Nuggets chungnung leh mah se Clippers hian point 102-100 in hnehna an chang ta hram a ni.
Clippers laka an tlawm tum hian Denver Nuggets player pawimawh Nikola Jokic chuan point 36 a thawkchhuak a, ball sawhlet vawi 17 a dawn bakah assist vawi 10 a nei bawk a, triple-double a puitlin. Most Valuable Player ni tura rinkai zinga mi Jokic chetha viau mah se Clippers player te an khel tha rual hlawm a. Paul George chuan point 28 a thawkchhuak a, James Harden chuan point 20 thawkchhuak bawkin champion lai lakah hnehna hlu tak an chang.
Season kal meka beisei phak lo Golden State Warriors an insiam tha a, zirtawp zing khan a zawna a vawirukna ni turin an chak a. An khingpui Houston Rockets chu point 133-110 in an hneh. Warriors tan hian Stephen Curry leh Klay Thompson ten point 29 ve ve an thawk chhuak. Inkhel dangah Dallas Mavericks chuan Atlanta Hawks an hneh ve bawk.