Ningani zan khan English Premier League-ah inkhel pahnih a awm a, table chung bera kir leh turin Liverpool in an mualah hnehna an chang. Liverpool an chak lai hian Manchester United erawh che Chelsea lakah an tlawm ve thung.
Nilai zanah Arsenal an chak vanga pahnihnaa tlahniam Liverpool hian Anfield-ah table mawngphaha awm Sheffield United an mikhual. Reds hi an mualah an khel tha viau a, an phu ang ngeiin hnehna an chang. An muala point thum an hmuh hmangin Reds hian Arsenal an lehpel a, table chung berah an kir leh nghal.
EPL-ah champion ngei tuma tan khawh Liverpool hian an mualah an khel tha viau naa an goa hmasa ber erawh vanneih goal a ni. Reds forward Darwin Nunez chuan a tiamak rah a seng. Nunez hian inthlahdah hauh lovin ball a um, he ball hi Sheffield United si nghak Ivo Grbic chuan na taka petchhuah a tumna lamah Nunez hi a pet per a, ho ang reng takin minute 17-naah goal an chhuah. He vanneih goal hmang hian Reds in si khat faia hmahruai chungin chawlhlawk an hmang.
Chawlhlawk hnu lamah Liverpool an vanduai ve thung a, goal an chhuah ve thuai. Minute 58-na lekah Liverpool player Conor Bradley chuan an lamah a ti-goal a, Sheffield United si phurh a sut sak. Goal khat ve ve an thun hnuin inkhel a hmuhnawm zui viau a, goal thun tumin an innawr tawn nasa hle. Reds hian mawi taka ball an inpek kual hnuin midfielder Alexis Mac Allister chuan minute 76-naah pui zetin a pet goal a, hma an hruai nawn lehna goal a thun.
Alexis Mac Allister goal thun hnuin Liverpool an khel tha chhunzawm a, hun tawp dawn hnaih minute 90-naah Cody Gakpo chuan an goal thumna thunin an chakna a nemnghet. Gakpo goal thun hnu hian hun tawp thlengin goal dang a luh belh tawh lova, Liverpool in hnehna pawimawh tak an chang.
- United an tlawlh thlu
Team lian zingah season kal meka beisei phak lo pahnih; Chelsea leh Manchester United te chu Stamford Bridge-a an inhmachhawn a, chak theihna hun nei tha United an tlawlhthlu a, tlawm zawkah an tang. Chelsea lakah an tlawm vangin United tan champions league khelh phak beisei ngam a harsa leh zual dawn.
Sum seng hnem chunga result tha nei hleithei lo Chelsea hian United lakah bul an tan tha viau a, inkhel tan atanga minute lina lekah Conor Gallagher chuan hmahruaina goal a thun nghal. Hma taka goal an thun hnuin Blues an khel tha chhunzawm a, goal an thun belh leh thuai. EPL player tha ber zinga tel phak der tawh Cole Palmer chuan minute 19-naah penalty atangin an goal hnihna a thun. Minute 19 chhung leka goal hnih an thun hman vangin Chelsea hian chak theihna hun tha tak an nei.
Goal hnih chhuah hmasa mah se United an buai lova, chawlhlawk hmain an si phurh an sut zo hmang. Minute 34-naah Alejandro Garnacho chuan goal thunin an si phurh a sut then a. Bruno Fernandes chuan minute 39-naah an goal hnihna a thun a, an si phurh a sut zo.
Chawlhlawk hnu lamah United in bul an tan tha a, Chelsea in an tawp an khar tha ve thung. United goal khatna thuntu Alejandro Garnacho chuan minute 67-naah hma an hruai letna goal a thun. He goal hmang hian hun pangngai tawp thleng hma an hruai a, Stamford Bridge-ah ngei an chak teuh hle.
Dinhmun chhe takah ding hman mah se Chelsea an zam lova, a tawp an khar tha ta viau bawk. Hun pek belh tawp dawn tep minute 90+10-ah Palmer chuan penalty pet goal in an si phurh a sut. An si phurh a sut atanga minute khat hnu lekah Palmer hian goal a thun zui leh nghal zat a. Palmer hattrick siam hmangin Chelsea hian United lakah hnehna pawimawh tak an chang zui ta a ni.