Pathianni zan dar 8:00 hian English Premier League-ah inkhel ngaihven hlawh tak a awm dawn a, club inhal em em pahnih; Manchester United leh Liverpool te chu Old Trafford-ah an inkhel dawn. An hmelma lian ber United lakah an chak a nih chuan Liverpool in EPL ah champion theihna hun tha tak an nei dawn. United hian Liverpool hneh hrim hrim an chak dawn bakah an mualah an chak lo a nih chuan Champions League khelh phak a har tawh dawn a, Old Trafford ah ngei chak an tum hle dawn.
United hmelma lian ber Liverpool hian khelh 30 atanga point 70 hmuin EPL hmahruaitu an ni a. Khelh hmabak pariat an la neihah United hi khingpui hautak deuh ber tura ngaih an ni tawh. Chuti a nih vang chuan United lakah an chak a nih chuan champion turin an dinhmun a tha lehzual viau dawn a. Old Trafford-ah tlawm an pumpelh a nih pawhin an tan result chhia a ni lo ang. Red Devils lakah an tlawm a nih erawh chuan an tan champion a harsat phah thei viau dawn thung. Erik ten Hag-a enkawl Manchester United hi EPL ah an champion dawn lo tih a chiang tawh a. Champion lo rau rauah Liverpool kawng an dal theih chuan champion tluk thawthangin an lawm ngei ang.
Season kal meka beisei phak lo Manchester United hian khelh 30 atangin point 48 an hmu a, paruknaah an awm mek. Palinaa awm mek Aston Villa chu point 11 zetin an phak lo mek a, champions league khel phak turin kawng hautak tak an zawh a ngai. Champions League an khel phak lo a nih chuan an manager Erik ten Hag a chhuah ngei a rinawm.
Season kal mekah United leh Liverpool hi vawi hnih an inhmachhawn tawh a, United an chungnung zawk. Anfield-ah ngei goal awm lova an inhnehtawk hnuin FA Cup-ah Manchester United hian 4-3 in hnehna an chang. FA Cup atanga an hnawhchhuah tawh hi EPL ah hneh nawn leh ngei an tum dawn a, an mualah hnehna chang turin inrintawkna sang tak an nei ang. Hetihlai hian Liverpool hian an hmelma lian laka tlawm zawn an duh dawn hauh lova, Old Trafford ah chak tumin thih tha tak meuh meuh an thawh ang.
Red Devils leh Reds te hian ninga zan khan inkhel an hmachhawn ve ve a, hahdam bik an awm dawn lo. Old Trafford-ah inkhel hmuhnawm tak en tur a awm dawn. Tuin nge hmaih phal teh lul ang ni!!
Inelna hrang hrangah United leh Liverpool te hi vawi 241 zet an intum tawh. United hian vawi 91 hnehna an chang a, tlawm zawkah vawi 81 an tang ve tawh bawk a, vawi 69 an inhnehtawk tawh.