- Dr. C. Lalrampana
A KAMKÊUNA
Kâikuang hi chihnih a awm a, seh na tak, a seh tawh chu a thlah duh mai mai lova, a seh hlum hial thei thin niin sawi a ni. Hetiang Kâikuang lian chi, seh na chi hi ‘scorpion’ an tih hi a ni a, Mizotawng chuan ‘Khawmual Kãikuang’ tihba ni. Tin, Kâikuang tê chi seh na ve tho a awm bawk a; hetiang hi ‘Shrimp’ an ti a, hetiang chi hi a ni ngei ang Chemtatrâwta Krismas balloon hampuara sehtu ngei kha! He Kâikuang avang hian Chemtâtrâwta hnuai (downline)-ami zawng zawngte kha an intilungawi lo tawn vek a, an inmawhchhiatin an inmawhpuh kual tawn vek a, tuikhur thleng khan a thin a rima a kang chah phah ta a nih kha! Pawilhawihtu bulpui ber, Chemtâtrãwta ti thinurtu ber Kâikuang hi zawng chimawm tak a ni. Hei vang tak hian alawm thil dik lo leh thil pawi thlen apianga hmanlai upate’n “Tunge a Kâikuang ber” tia tawngkauchheh an lo hman thin nachhan chu!
TUNLAI DINHMUN
Tunlai thiamna changkang zelah vantlang inbiakpawhna social media leh mass-communication technology thang chak tak avangin FB, Snapchat, Pinterest, Tumblr, whatsapp; Youtube; Instagram; telegram; twiter@x etc. chihrang hrangte’n kan khawsak dan leh hawiher, nungchang a her danglam hneh hle. A thenin kan tangkaipuia kan thatpui êm êm laiin Social Media Statistics-in nghawng tha lo a neih thar ber berte an puan. Social media hmangtu zinga 64% chuan anmahni nun emaw, an hlawhtlinna emaw chungchangah an tling tawk lo niin an sawi niin BetterHelp national survey chuan a tarlang. Khawvel mihring 62.3% chuan social media an hmang a. January 2024-a report-in a tarlan danin ni khata hman zat chu darkar 2 leh minute 23 a ni.
Social media application lar tak tak an hman tam ber chu WhatsApp, Facebook, Instagram, Twitter, Snapchat, Pinterest, Tumblr leh YouTube te an ni. He zirchiannaah hian social media hian Mizorama thalaite nun information hman danah nasa takin nghawng a nei tih hmuhchhuah a ni. Tunlaia mizo nu pakhat Youtuber thenkhatin an theh lar ém êm, Mizoram leh hnam timualpho thei an buaipui êm êm maite hi Mizo khawtlang nun leh thalai, naupang nun thlenga nghawng pawi thei a ni. Mahse, a bul tantu a ‘Kãikuang’ dik tak zawk chu Mizo nu emaw, Yutuber thenkhatte emaw, ni lovin Mizoram Sorkar @mipui sorkar ngei hi a ni. Tunhnaia man chhuah fake account hmangtu Spa Jongte, MNF Gen. Hqrs-a Joint Secretary man a nih tum khan kan CM khan Fake Account chhuichhuah zel a nih tur thu leh social media hmang sualte dim an nih loh tur thu a sawi kha a ni a. Mahse, Youtuber thenkhatten Mizoram leh hnam, khawtlang nun khawih pawi thei tih hriat reng an pholang vak vak thin hi Sorkar atangin zilhautu (monitor) an awm lo em ni?
FIR HI ENGE NI?
FIR hi ‘Inhrilh hriatna hmasa emaw, inhriattirna hmasaber’ tiin sawi fiah ila a dik zawber mai awm e. FIR chungchang tih thupui hmanga Ruatfela Nuin FB lama a post hi chhiar phawt teh ang:
“Tunlaia hmeichhe pakhat, mipa hrang hrang kawp lawra zu leh hur sualna lam rawngkaia social media site hrang hranga inpho lang thin hian a ti leh a nih chuan FIR ka theh lut ang. A thiltih hi ram leh a chhunga hnamte zah lohna a ni a, dan bawhchhiatna pawh a ni. Naupang zawkte hmuh leh hriata thil tha lo tak a ni bawk a. He hnam hi a tibawrhbang a ni.” – RUATFELA NU tiin. A sawi lawk ang ngeiin April 2, 2024 khan Ruatfela Nu hian FIR chu Officer-in-Charge, Police Cybercrime Branch hnenah a thehlut ta a ni.
Thawkaphita FIR hmatheh lutuk hi thil tha ber a ni lo. Sorkar hian Social media hmang diklotute hi FIR chelek kher ngai lovin a zilhauin rule of law a kalpui mai tur a ni. Information Technology Act, 2000 a awm a, cybercrime & law a awm bawk a. SM hmang diklotute hi dan ang chuan kum thum chhung lung ina tantir leh pawisa chawitir theih a ni. Section 69A: ang hian sorkar thupek nena inmil lo information eng pawh enfiah, decrypt emaw intercept emaw theihna sorkar hian thuneihna a nei a ni. A bikin Youtuber thenkhatho hian an duh duh an upload-in an pholang zung zumg thin a, hei hian Zoram mipuite min tiluhai thin a ni. A nihna takah chuan Mizo pasaltha chanchin dâwt hlang hlak phuahchawp pawh hi dâwta inbumna lian tak a ni.
A TLÃNGKAWMNA
Social media hi tangkai hle mah se, a dik lo zawnga hman chuan chhiatna thlentu a ni. Ruatfela nu sawi pawh hi engang pawhin zah hre lovin pharvar mah se, Youtuber-ho hian pholang duh miah lo se tuman kan hre lovang. An pholan sek avangin a punlun tual tual ta thin a ni. Amah hmeichhia hian zah hre lovin video clip siamin thehdarh mah se, nitin darkar tina Social Media thlithlaitu Mizoram Police Cybercrime Branch an awm reng a Ruatfela Nu FIR vang emaw, Mizoram State Commission for Women-in Suo moto a file kher ngai lo hian finfiaha man zung zung theih reng an ni. Sorkarin hnam tana pawi thei tur pholang zung zungtu Youtuber thenkhatte hi khap bet nghal hmiah zel se, luhlula thu awih lo chu sec. 69A ang khian man zel mai se a reh hmiah mai thin tur a ni. Mahse, Sorkar lamin hma a lak mai thin loh avangin FIR, Suo moto hman a ngaileh ta thin a ni. Kan Home Minister hi a chaka a viak a that tehlul nen Social Media & Technology Abuse @Digital Abuse lamah hian a tuan a fum deuh niin a lang, nge Police Cybercrime lam hi an inthlahdah zawk em ni? A nihna takah chuan heng thil tha lo leh diklote hi a taidarh hmaa khap bettu tur mawhphurtu ber a kaikuang ‘Shrimp’ dik tak chu Mizoram Sorkar ngei hi a ni e.