Mizoram sorkar chuan tunhnaia ruah, rial leh thliin chenna in a tihchhiat sakte chhawmdawlna atan State Disaster Relief Fund (SDRF) atangin cheng nuai 450 a pe chhuak.
Tarlan tawh angin, March 31 atanga April 2, 2024 chhunga ruahsur, thli tleh leh rial tla avangin Mizoram hmun hrang hrangah chenna in 2,646 a chhia. Chenna in chhia 2,646 zinga 335 chu luahzui tlak lohin a chhe vek a, 2,311 chu a chhe vek lo thung.
Chenna in chhiate chhawmdawl thuai an nih theihna atan SDRF nodal department Disaster Management & Rehabilitation (DMR) department chuan hma an la nghal a, DMR minister K Sapdanga hoin April 1 khan official-te an thukhawm.
Chhiatna tuarte chhawmdawlna atan SDRF fund atanga emergency-a rangva leh silpauline lei nghal tur a tih a nih angin order siam nghal a ni. Rangva hi eng emaw zat lo thleng tawh. Hei bakah hian DC-te’n SDRF fund an kawl sa theuh atangin emergency-in a theih ang angin chhiatna tawkte hnenah tanpuina an lo pechhuak mek zel.
DMR department chuan SDRF fund pawh hi emergency a dil belh nghal a, Finance department chuan April 4 khan a pe chhuak. DC-te hnenah a rang lama pe chhuak turin hmalak nghal niin, April 6, Inrinni khan DC tin hnenah pek fel a ni.
DC-te hnena sum pek chhuah hi respond & relief atan cheng nuai 225 leh recovery & re-construction atan cheng nuai 225 a belkhawmin cheng nuai 450 a ni.
Sum pek chhuah dan
(Rs. in lakhs)
District Pek zat
Aizawl 100
Lunglei 50
Siaha 20
Champhai 40
Kolasib 40
Serchhip 40
Lawngtlai 30
Mamit 30
Saitual 40
Hnahthial 30
Khawzawl 30