Pathianni zanah Tottenham in hnehna an chang a, Aston Villa lehpelin palina an luah let leh. Tottenham an chak laiin Chelsea chu table mawngphaha awm Sheffied United lakah an chak zo lo thung.
Palinaah luah let leh tura chak mamawh Tottenham hian an mualah table hnuai lama awm Nottingham Forrest an mikhual a, an mualah 3-1 in hnehna an chang.
Chak ngei tuma an muala inlan Tottenham hian bul an tan tha viau a, an vannei tel bawk. An mikhual Nottingham Forrest player Santiago Costa dos Santos chuan minute 15-na lekah an lamah a ti-goal a, Tottenham hmahruaina goal a thunsak. Chesual hma viau mah se Forrest an insiamtha thuai a, Chris Wood chuan minute 27-naah goal thunin an si phurh a sut. He goal hmang hian 1-1 a inhnehtawk chungin chawlhlawk an hmang.
Chawlhlawk hnu lamah Tottenham an khel tha lehzual a, goal hnih an thun belh thuai. Minute 52-na lekah Micky van de Ven chuan hma an hruai nawn lehna goal a thun a. De Ven goal thun atanga minute ruk hnu lekah Pedro Porro chuan goal thun belhin, an hmahruaina a tizau. Inhnaih chilh taka goal hnih an thun zawn hnuin goal dang an thun belh thei tawh lo va, Tottenham chuan an mualah hnehna pawimawh tak an chang zui ta a ni.
Nottingham Forrest laka point thum an hmuh hmangin Tottenham hian khelh 31 atangin point 60 an hmu a, point 60 hmu ve mek Aston Villa aiin goal difference-ah an tha zawk a, palinaah an inhlangkai.
Tottenham an chak lai hian London hmar veng club lian dang Chelsea chu Table mawngphaha awm mek Sheffied United nen 2-2 in an inhnehtawk ve thung.
Bramall Lane-a lenglut Chelsea hian bul an tan tha a, minute 11-na leka Thiago Silva goal thun hmangin hma an hruai. Hma taka an si phurh hi minute 32-naah Jayden Bogle goal thun hmangin an sut a, 1-1 a inhnehtawk chungin chawlhlawk an hmang.
Chawlhlawk hnu lamah pawh Chelsea in goal an thun hmasa leh a, minute 66-naah Noni Madueke goal thun chu an chakpui teuh hle. Sheffield lakah an chak mai dawna a lan hnuin Oliver McBurnie chuan minute 90’+3-ah goal thunin an si phurh a sut mial a, Chelsea lakah tlawm an pumpelh zui ta a ni.