AZL: MNF Vice President Lalchhandama Ralte in ZPM sorkar chu Kolkata Mizoram House chungchangah ZPM kaihhruai sorkar chu Calcutta High Court-ah a mualpho niin a sawi.
Thawhtannia Mizo Hnam Run chhung inkhawmah Leader of Opposition ni bawk, Lalchhandama Ralte, MLA chuan ZPM sorkar chu Kolakata Mizoram house chungchangah mipui bum an tumna laihlan sak an ni tih a sawi a. Kolkata Ballygunge hmuna Mizoram House hlui chu hralh a, Mizo mipui ten tangkai zawka an chhawr theih tur, House lian leh dawng hlawk zawk sa tura sorkarin ruahmanna a lo siam chu ZPM sorkar tharin thil awmdan kimchang hre ve lo te fuihpawrhnan hman tumin, ram hralhna lehkha lo siam tawh leh a man pawh dawn fel vek tawh chu mumal lo taka cancel-na thupek a ti chhuak niin a sawi a. ZPM sorkar thupek hi Calcutta High Court chuan Thawhlehni khan a hnawlsak a, sorkarin cancel anih chhan an sawi ‘mipui nawlpui tana tha zawk tur’ tih chu Court hian hnawlsakin, politics thila hamthatna lak tumna lam hawi zawk a nih thu a sawi niin a sawi.
Lalchhandama Ralte chuan Kolkata Ballygunj-a Mizoram house awm thin chu, a hmun ngaia sa tha tur hian building regulations hmanlaiin Mizo chhiara chhawng thuma sang baka sak a phal lo a ni lo a. Kolkata Mizo House hi pantu an pun zel avangin chhawng thum ringawt chuan a dawng hlawk lo hle dawn a, mipuite mamawhna sang zel a phuhru zo dawn loh avangin, Ballygunge-a Mizoram House awm thinna hmun hlui chu hralhin, Salt Lake lamah Mizo mipui tam zawkin an chhawr theih tur, House lian tha leh dawng hlawk zawk sak tum a ni. Hei hi ZPM sorkar thar chuan chuan politics-a sorkar liam ta beihna hmanruaah hmangin, social media lamah thu dik lo hmanga mipui bum tumna an aupui nasa hle tih a sawi.
MNF Vice President chuan ZPM sorkarin ngaihtuahna fim hmang lova sorkar kal ta tih hmingchhiat tuma thutlukna mak tak tak an siam thin leh, thu phawkphawhraw pui pui an sawi thin hian an puitlin loh zia a pholang chho zel tih sawiin, “December ni 14, 2023-a Council of Ministers thukhawm khan, ‘Lengpui Airport chu AAI hnena hlan turin hmalak a ni ang a. Chutiang bawkin ZMC pawh central sorkar kuta hlan tura hmalak a ni ang,’ tih an lo rel ringawt tawh bawk. Hemi tum hian a kaihhnawih Dept. atangin Cabinet Memorandum buatsaih pawh a awm lo nia sawi a la ni ta deuh deuh lehnghal,” a ti bawk.
Hnam Run chhung inkhawm hi MNF Vice President Vanlalzawma’n a kaihruai a ni.