Lamtual atana Aizawl lammual hmang tawh American rock band FireHouse zaipu C.J. Snare chu kum 64 mi niin a boral.
Kum 2008 December 18-a Aizawl khawpui awitute zingami Snare-a thihna hian rimawi khawvel a barkhaih hle.
Band thuchhuah siamah, “Rock N Roll tan Ni lungchhiatthlak tak a ni a, kan unaupa, rock n roll mihuai, zaipu leh Firsehouse band dintute zingami ni bawk CJ Snare kan chan ta, tih hi rilru hrehawm tak chungin kan puanchhuah a lo ngai ta. CJ hi April 5, 2024 khan zirtawp zan khan a boral a, kum 64 mi a ni,” an ti.
Snare hi karhmasa khan a pum lam chian lohna vangin zai a ni a, tha chho leh mai tura beisei a nih laiin, rin loh takin khawvel a chhuahsan thut mai a, chhungte leh thiantha te bakah fan te hrilh a hai hle.
FireHouse hi 1984 khan din tan niin, 1987 khan band zaipu ni turin Snare hi alut. Snare leh FireHouse te hian rock/glam metal meipui chhem alh nawnin, 90s tir lam khan hla hit tak tak an nei chho a. ‘Love of a Lifetime’ (1991) leh ‘When I Look Into Your Eyes’ (1992) te’n hriat a hlawh zual mai bakah Mizo thalaite band ngainat ber zingah an tel pha.
Snare leh FireHouse te hian album pasarih tichhuakin, 2003 kum a ‘Prime Time’ kha an kutchhuak hnuhnung ber a ni ta.