MNF President Zoramthanga chuan MP (LS) inthlanna neih tura MNF candidate K Vanlalvena chu Zoram mipui candidate a nih anga mipuiin an lawm laiin, ZPM candidate erawh chu belebut taka vawrh chhuah, an hotu thenkhatte hriat kim loh a nih thu a sawi.
Nilaini khan Mizo Hnam Run-ah MNF hruaitute – Elected OB, National Core Committee, PAC, Advisers, General Secretaries leh Secretaries te chu MP (LS) Inthlan campaign kal mekte thlir hoin an thukhawm a. He hunah thu sawiin MNF President chuan, an party MP (LS) candidate K Vanlalvena chu nomination committee in ngun taka a ngaihtuah chunga an thur chhuah chu an vanneih pui ngei a beiseiawm tih a sawi.
K Vanlalvena chu mipui rilrem tak MP ni mek, huaisen leh ram leh hnam tana inpe tak a nihna te an hriatpui avangin mite ngaihzawn a hlawh em em a nih laiin, ZPM candidate erawh belebut taka an hotu thenkhat hriat kim lemloh leh, an hruaitute zinga itawm tak tak an neih thlimna kara an vawrhchhuah a ni tih a sawiin, “Hei hian mipui mar deh kawngah ngaihtuahna thui tak seng leh senglo hmel alo tilang ta a ni,” a ti.
MNF President chuan, K.Vanlalvena dinhmunin san lam a pan zel avangin beihna chi tinrengin an bei chho zel tih sawiin, “A inhnamhnawih reng reng lohna Kolkata a Mizoram House hmun nuam zawk leh zau zawk, lian zawk leh dawng hlawk, remchang zawka sak tum avanga a hlui tihral chungchang te nasa takin an vawrh vel mek a ni a. Hralh tum hun laia engmah sawi duh lovin mipui rilru vawiinah hruaikawi an tum mek a ni,” tiin, mi mal a chhe zawnga insawisak vak vak hi thil hrisello leh a hnam ang pawha hmel tibaltu a nih theih avangin, hetiang uar thin pawlte ze chhe tak hi ching ve hauh lo turin MNF party hruaitute a chah.
He hun hi Tawnluia, Chairman, MNF MP (RS) Election Campaign Directorate chuan kaihruaiin, Lalruatkima, Vice Chairman, MNF MP (RS) Election Campaign Directorate chuan hmun hrang hranga campaign neih mek report a pe bawk.