Aizawl : MNF party MP (LS) candidate K Vanlalvena’n politics a khelh chhan chu sum leh pai, therhlo ni lovin, Mizo hnam damna tur atan a nih zawk thu a sawi.
Lok Sabha MP inthlan lo awm tur atana campaign beihpui thlak Nilainia Lawngtlai Areopagy-a street campaign an neihnaah K Vanlalvena chuan, “Assam nen kan buai hlim khan Assam Chief Minister-in Mizoramah sipai tha chi commando 4000 a rawn tir dawn tih media-ah ka lo hmu a, chanchinthar thehdarh tuten min rawn kawm a, an lokal leh anih chuan kan lo tingmit vek ang ka tih kha, tuna kan ram hruaitu lu berin nuihza siam nan min hmang kha mak chu ka ti a, ka huat phah chuang lo,” a ti.
Ram hruaitute chuan ram hi an theih anga nasa in an hmangaih theuh tura a ngaih thu sawiin K Vanlalvena chuan, “MP inthlan lo awm tawhah ruling hian opposition lam an beih vak vak ka hre ngai lo, kei chuan beih ka tawk nasa hle a ni. Tunah hian Pathian ka hmachhuan a, kei leh kan party hi tla hlim ni mah ila, Lalpa’n min pui ang a, ka thlaphang lo reng reng a ni,” tia sawiin, politics a khelh chhan chu sum leh pai, therhlo lam a ni lo va, hnam damna tur atan a nih zawk thu leh hnam damna tura politics khel ngam lo chuan khel lo mai se tih chu a ngaihdan a nih thu a sawi.
Thusawitu dang, MNF Senior Vice President Dr. R.Lalthangliana chuan, “Kristian sakhua nekchepna do tura nasa taka parliament-ah au chhuak ngam kristian MP awmchhun, India sorkar official-te leh a member puite hmel hriat nei tha sa, inzir chawp ngai lo Pu Vena hi thlang tling i la, Mizoram chhunga cheng leh khawvel hmun hrang hranga cheng zofate tan a thlamuan thlak hle dawn a ni,” a ti.
Dr R Lalthangliana chuan MP tam tak, term khat chhunga thu sawi ve miah lo an tam thute a sawiin, MNF MP candidate K Vanlalvena erawh chuan ram leh hnam him nan thusawi tul atih vangin a sawi a ni tiin,”Kan MP candidate dangte hi ka hriat zawng an ni lo a, anmahni sawiselna tur leh fakna pawh ka hre lo. Mahse, Pu Vena hi chu ram leh hnam vei mi, a rilrua lian ber chu Zofate inpumkhatna a ni,” a ti bawk.