Aizawl: BJP Lok Sabha MP candidate Vanlalhmuaka’n MP-a thlan tlin a nih chuan central-a minister ni thei turin green signal pek a nih tawh thu a sawi.
Nilaini khan Kolasib Press Club-ah thu thar thehdarhtute kawmin BJP Mizoram President ni bawk Vanlalhmuaka chuan Kristian MP candidate zinga Lok Sabha-a ding awm chhun a nih thu sawiin, “MP-ah ka tling a nih chuan central hotuten central-a Minister ni thei turin green signal min pe tawh a, BJP MP candidate chu Mizoram tan central minister nih theihna awm chhun a ni,” a ti.
Vanlalhmuaka chuan central minister-ah Dr C Silvera chu Mizoramin a nei tawhin, Mizoramin hmasawnna a nei nasa hle tih a sawi a. Tun tumah pawh hian Mizoramin BJP MP a nei a nih chuan PM Scheme hrang hrang heng in sakna tur neilo insak takpuina te, lo neitute tana tanpuina leh loneitu kum 60 alo tlin huna pension an lak theih ngei na tur bakah, gas connection neilo te hnena a thlawna gas connection pek tura hmalak nghal a nih tur thu a sawi bawk.
Congress party chu inthlan dawn apianga kristian ramah Hindu sakhua din tumah BJP an puh ziah thin tih sawiin Vanlalhmuaka chuan, “Kei ni Mizoram BJP te hi pawisa duh vangin vai pathian hmaah chal hnawih sen leh coconut sawhkeh hi kan ti ve ngai dawn lo,” tia sawiin, Congress party chu inthlan dawn apianga dawt hmanga BJP beih bansan turin a chah.