Aizawl: Aizawl traffic police-in a tum hnih nan lirthei hrang number in ang an man a, thil ti dik lo tute chhui chhuah a nih theih nan FIR theh luh a ni.
Aizawl traffic SP Stephen Lalrinawma’n a sawi danin, maxicab services lai mekah registration number in ang hmang an awm thu report an dawng a, a, an chhui chian hnuah MZ-01J-3150 number vek bel lirthei pathumte chu an man chhuak a, chung maxicab te chu an hren mek thute, dan pela thil dik lo tih chungchangah hian FIR theh luh a ni tih a sawi a, number in ang tlang bel maxicab pathum zinga 2 chu Zokhawthar leh Aizawl inkara tlan an ni a, pakhat chu Pangzawl leh Aizawl inkara tlan a ni thung.
Traffic SP chuan, number in ang bel lirthei te chu tuna a nei tu ni mek te’n facebook kaltlanga mi ta hlui an lei a nih thute, an zinga pakhatin document telin lirthei hi a lei a, mi pahnih erawhin lirthei hlang an lei phawt a, hnua sumo permit leh document dang te chu midang hnen atangin an lei leh niin lirthei neitute hian an hrilh tih a sawi.
Stephen Lalrinawma chuan, lirthei hlui in leichhawn kawngah fimkhur a tul hle a, document lem te lei palh theih a nih avangin mipuite pawh in an thil lei turte an chik a tul tih a sawi a, lirthei lei chhawng tum te’n documents a felfai leh felfai loh te, ruk a nih leh nih loh te hriatchian tum thin tur a nih thute, lirthei hlui leite chuan dan angin a neitu nihna chu an thlak danglam thuai tur a nih thu a sawi.
Thudawn danin, Aizawl traffic Police te hian nikum lam khan number in ang bel lirthei hi an lo man tawh a, hemi chungchangah hian number dik zawk neitu in FIR theh lutin thubuai te pawh siam a lo ni tawh a ni.