Aizawl: MNF thalai chuan Chief Minister Lalduhoma chu diriam taka an chungchang a sawi thin avanga sorkar hnathawkte lakah ngaihdam dil turin an phut.
MNF thalai hruaitute chuan nimin khan Aizawl Press Club-ah chanchinbu mite an kawm a, an vice president Zodinpuia chuan, hun reilote Chief Minister a nih chhungin Lalduhawma’n Mizoram sawrkar hnathawkte diriam zawngin thu a sawi hnem tawh hle niin a sawi a, january thlaa Shillong a zin tum pawhin amah kawmtute hmaah sorkar hnathawkte chu a pawl angte, a department pum anga sorkar do let tum angin a lo puh tawh, a ti a, he thil hi thudiklo hmanga sawrkar hnathawkte putchhiatna ni ngeia a lan thu a sawi.
Assembly Budget session neih zawh takah pawh khan Mizoram Police te chu nasa taka diriam in, Mizoram mipui hma ah, Mizoram Police te chu thlamuanpui tlak an nih loh thu uar takin a lo sawi tawh, a ti bawk a, heng a thu sawite hi Mizoram sawrkar hnathawk zawng zawngte hmai tibaltu a nih thute, heng a thusawi thin avang hian April ni 18 hma ngeia Mizoram sawrkar hnathawkte chunga ngaihdam dil turin Chief minister chu an phut tih a sawi.
MNF thalai chuan ZPM sorkar chu sorkar hmasa in an din tih vang ngawta thalai hnazawng mekte leh zirlaite’n tangkai taka an chhawr MSSSB chu chhan mumal awm loa thiatah an puh a, hetihlai hian MPSC thuam chak tur erawhin hmalakna an nei lo niin an sawi a, ZPM chu an thutiam ang ti hlawhtling loah puh bawkin, Development Bank din an tum pawh dan tlawhchhanin loan pung awm loa pek chu tihhlawhtlin mai theih a lo tiin an sawi hle si, an ti.
Lok Sabha MP inthlanpui lo awm tura MNF candidate K Vanlalvena chu vote theuh turin mipui an sawm bawk a, MNF thalai chuan an party candidate chu mi huaisen leh taima taka Zofate tana hnathawk thin, Mizoram in MP kan neihtawh zinga Parliament House a thusawi tam ber leh zawhna siamhnem ber a nih thute, Myanmar leh Manipur zohnahthlakte tan pawh huaisen taka au chhuak ngam, kristian leh hnam tlem zawkte tana bill tha lo te dodal ngam a nih thu an sawi bawk.